ខេត្តស្វាយរៀង៖ យ៉ាងហោចណាស់មនុស្សប្រុស ស្រី១៤នាក់ រួមនឹងអ្នកបើករថយន្តទេសចរណ៍ភ័យទាំងព្រលឹងចុងសក់គ្រប់ៗគ្នា ខណៈដែលមានម៉ូតូមួយគ្រឿងបើកឆ្លងកាត់ផ្លូវខ្វះការប្រុងប្រយត្ន័បណ្ដាលអោយអ្នកបើករថយន្តគេចចេញធ្លាក់ចូលវាលស្រែ សំណាងមិនមានអ្នកគ្រោះថ្នាក់ ។

ហេតុការណ៍គួរអោយរន្ធត់នេះ បានកើតឡើងកាលពីវេលាម៉ោង១២និង១០នាទី ថ្ងៃទី១១ ខែកក្កដា ឆ្នាំ២០១៦នៅលើផ្លូវជាតិលេខ១ ចន្លោះគីឡូម៉ែត្រ ១៤១ និង១៤២ ស្ថិតនៅភមិ ដើមពោធិ៍ ឃុំស្វាយតាយាន ស្រុកកំពង់រោទ៍ ខេត្តស្វាយរៀង ។

យោងតាមសមត្ថកិច្ចនគរបាល ស្រុកកំពង់រោទ៍បានអោយដឹងថា មុនពេលកើតហេតុមាន រថយន្តម៉ាក KIA ពណ៌ ស ស្លាកលេខ ភ្នំពេញ ៣C ៣៥៩១ របស់ក្រុមហ៊ុន ភ្នំពេញ សូរិយា បើកបរដោយឈ្មោះ អែម នី ភេទ ប្រុស អាយុ ៥៤ឆ្នាំ មានទីលំ នៅភូមិ ភ្នំពេញថ្មី សង្កាត់ ភ្នំពេញថ្មី ក្រុងភ្នំពេញ បានធ្វើដំណើរពីទិសខាងលិច ទៅកើតលើកំណាត់ផ្លូវជាតិលេខ១ក្នុងល្បឿនមធ្យម ព្រមទាំងដឹកអ្នកដំណើរ ប្រុសស្រី១៣នាក់ លុះមកដល់ចំណុចខាងលើ ស្រាប់តែមានម៉ូតូមួយគ្រឿងមិនស្គាល់ម៉ាក បានបើកឆ្លងកាត់ផ្លូវខ្វះការប្រុងប្រយត្ន័មិនមើលឆ្វេងស្ដាំបណ្ដាលអោយអ្នកបើករថយន្តទេសចរណ៍ជាន់ហ្វ្រាំង ហើយបើកគេចធ្លាក់វាលស្រែធ្វើអោយអ្នកជិះក្នុងរថយន្តនាំគ្នាស្រែកលស់ព្រលឹងគ្រប់ៗគ្នា ។

ប្រភពបន្តថា ចំពោះអ្នកជិះលើរថយន្តមិនមានគ្រោះថ្នាក់ដល់អាយុជីវិតអ្វីនោះទេ គ្រាន់តែខូចខាតរថយន្តតែប៉ុណ្ណោះ ។

មូលហេតុ: រថយន្តបើករថយន្តក្រុមហ៊ុនភ្នំពេញសូរិយាគេចម៉ូតូដែលឆ្លងកាត់ថ្នល់បណ្តាលអោយរថយន្តឆ្លាក់ផ្លូវ ៕

ដោយ៖ យឹម សុថាន