ភ្នំពេញ៖ ជនសង្ស័យម្នាក់ដែលជាសិស្សថ្នាក់ទី១២ នៅវិទ្យាល័យជម្ពូវ័ន្ត ត្រូវបានកម្លាំងនគរបាលខណ្ឌដូនពេញ សហការជាមួយកម្លាំងប៉ុស្ដិ៍ផ្សារថ្មីទី២ ធ្វើការឃាត់ខ្លួនបន្ទាប់ពីយុវសិស្សរូបនេះបានធ្វើសកម្មភាពជួញដូរគ្រឿងញៀននៅចំណុចមុខផ្ទះសំណាក់យីហោសេរីសូរិយា  តាមបណ្ដោយផ្លូវលេខ៨១ ភូមិទី៧ សង្កាត់ផ្សារថ្មីទី២ ខណ្ឌដូនពេញ រាជធានីភ្នំពេញ កាលពីវេលាម៉ោង១១និង៣០នាទីព្រឹកថ្ងៃទី១១ ខែកក្កដា ឆ្នាំ២០១៦ ។

លោក ឃួន ងួន អធិការរងនគរបាលខណ្ឌដូនពេញបានឲ្យដឹងថា ជនសង្ស័យឈ្មោះ អ៊ុយ សុខសកល អាយុ២២ឆ្នាំ ជាសិស្សថ្នាក់ទី១២ នៅវិទ្យាល័យជម្ពូវ័ន្ត ស្នាក់នៅក្នុងបុរីសន្តិភាព២ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។

លោកអធិការរងបានបន្តទៀតថា ករណីបង្រ្កាបនេះគឺដឹកនាំផ្ទាល់ដោយលោកវរៈសេនីយ៍ឯក ហួត ចាន់យ៉ារ៉ាន់ អធិការដ្ឋាននគរបាលខណ្ឌដូនពេញ ដោយមានការចង្អុយបង្ហាញពីលោកជួន សុវណ្ណ លោកនាយឧត្តមសេនីយ៍អគ្គស្នងការរងនិងជាស្នងការដ្ឋាននគរបាលរាជធានីភ្នំពេញ បានឲ្យកម្លាំងនគរបាលខណ្ឌដូនពេញធ្វើការល្បាតនិងស្រាវជ្រាវក្នុងមូលដ្ឋានដើម្បីទប់ស្កាត់បទល្មើសផ្សេងៗដែលកើតមានឡើងជាយក្សថាហេតុ រហូតដល់ថ្ងៃកើតហេតុខាងលើ កម្លាំងនគរបាលអធិការដ្ឋានខណ្ឌដូនពេញ បានទទួលព័ត៌មានសម្ងាត់ថា មានការជួញដូរគ្រឿងញៀនមួយនៅចំណុចមុខផ្ទះសំណាក់យីហោសេរីសូរិយា  តាមបណ្ដោយផ្លូវលេខ៨១ ភូមិទី៧ សង្កាត់ផ្សារថ្មីទី២ ខណ្ឌដូនពេញ ដូច្នេះហើយទើបលោកដាក់កម្លាំងពួនស្ទាក់ទីតាំងខាងលើនេះរហូតឈានទៅដល់ការឃាត់ខ្លួនជនសង្ស័យជាក់ស្ដែងតែម្តង ។

បន្ទាប់ពីឃាត់ខ្លួនជនសង្ស័យវត្ថុតាំងចាប់យកម្សៅក្រោម ពណ៌សថ្លា ចំនួន៤កញ្ចប់តូចធំ លុយ១មឺុនរៀល ទូរស័ព្ទ២គ្រឿង ម៉ូតូ Scoopy មួយគ្រឿង ពណ៌ស ពាក់ស្លាកលេខ ភ្នំពេញ1AE-1233 ។

បច្ចុប្បន្នជនសង្ស័យរួមនិងវត្ថុតាំងត្រូវបានឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញដើម្បីកសាងសុំណុំរឿងបញ្ចូនទៅសាលាដំបូងរាជធានីភ្នំពេញចាត់ការតាមនីតិវិធី ៕

ដោយ៖ ស ដារ៉ា