ភ្នំពេញ៖ មនុស្ស៥នាក់រួមនិងឧបករណ៍ប្រើប្រាស់មួយចំនួនត្រូវបានកម្លាំងនគរបាលខណ្ឌសែនសុខធ្វើការឃាត់ខ្លួន បន្ទាប់ពីពួកគេទៅប្រមូលផ្តុំគ្នាជក់គ្រឿងញៀននៅមុខពេទ្យលោកសង្ឃ កាលពីម៉ោង១១ និង១០នាទីព្រឹកថ្ងៃទី១២ ខែកក្កដា ឆ្នាំ២០១៦ ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ។

ការចុះបង្ក្រាបនោះដឹកនាំដោយលោក គួក សុខហួរ អធិការរងខណ្ឌសែនសុខតំណាងលោកវរសេនីយ៍ឯក ម៉ក់ ហុង អធិការនគរបាល
ខណ្ឌ និងមន្ត្រីនគរបាលជាច្រើននាក់ទៀត និងសម្ភារប្រើប្រាស់មួយចំនួនផង។

លោក គួក សុខ ហួរ អធិការរងខណ្ឌដែលដឹកនាំកម្លាំងចុះផ្ទាល់បានឲ្យដឹងថា ដោយមានការបញ្ជាផ្តាល់ពីលោក ម៉ក់ ហុង អធិការនគរបាលខណ្ឌសែនសុខបានឲ្យលោកដឹកនាំកម្លាំងចុះធ្វើរដ្ឋបាលនៅចំណុចខាងលើជាប្រចាំដោយធ្វើយ៉ាងណាដើម្បីកាត់បន្ថយនូវក្មេងៗដែលតែងតែមកប្រមូលផ្តុំគ្នាប្រើប្រាស់គ្រឿងញៀន និងទប់ស្កាត់នៅរាល់បទល្មើសផ្សេងៗដែលអាចកើតមានឡើង ទើបលោកបានដឹកនាំកម្លាំងចុះឈានដល់ការឃាត់ខ្លួនបានមនុស្ស៥នាក់ និងចាប់យក ម៉ូតូ២គ្រឿង ឧបករណ៍សម្រាប់ប្រើប្រាស់មួយចំនួន។

បច្ចុប្បន្នក្រុមប្រើប្រាស់គ្រឿងញៀនរួមទាំងវត្ថុតាងខាងលើត្រូវបាននាំខ្លួនយកទៅធ្វើការសាកសួរនៅអធិការដ្ឋាននគរបាលខណ្ឌសែនសុខដើម្បីធ្វើតេស្តរកសារធាតុញៀន៕

ដោយ៖ តុង សីហា