ភ្នំពេញ៖ ជនសង្ស័យម្នាក់ក្នុងចំណោមបក្ខពួក២នាក់បានធ្វេីសកម្មភាពឆក់ទូរស័ព្ទIPhone5 ពីឪពុកកូន២នាក់បានសម្រេច តែគេចមិនរួចត្រូវម្ចាស់ស្រែកនិងដេញតាម ហេីយត្រូវប្រជាការពារដេញចាប់បានម្នាក់វាយទ្រមខ្លួនចំណែកម្នាក់ទៀតរត់គេចខ្លួនបាត់ ។

ហេតុការណ៍នេះបានកេីតឡេីងកាលពីវេលាម៉ោង១០និង១០នាទីយប់ថ្ងៃទី១២ ខែកក្កដា ឆ្នាំ២០១៦ នៅចំណុចមុខវត្តបុទុម តាមបណ្តោយវិថីស៊ូស្រ៊ុន ស្ថិតក្នុងភូមិ៣ សង្កាត់ចតុមុខ ខណ្ឌដូនពេញ។

សមត្ថកិច្ចបានឲ្យដឹងថា ជនសង្ស័យដែលឃាត់ខ្លួននោះមានឈ្មោះ កេត វ៉ារ៉ូ អាយុ២៤ឆ្នាំ មានមុខរបរជាព្រូឡាន ស្នាក់នៅការ៉ាសឡានមួយកន្លែង ក្នងសង្កាត់កាកាប ខណ្ឌពោធិ៍សែនជ័យ។

ប្រភពព័ត៌មានពីជនរងគ្រោះសុំមិនបញ្ចេញឈ្មោះបានប្រាប់ឲ្យដឹងថា នៅមុនពេលកេីតហេតុរូបគាត់និងកូនប្រុសម្នាក់បានជិះម៉ូតូហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ ភ្នំពេញ 2H-4356 ឌុបគ្នាចេញពីកោះពេជ្រ ពេលមកដល់ចំណុចជិតសួននាគបាញ់ទឹក ខណៈកូនរបស់គាត់កំពុងចុចទូរស័ព្ទលេីម៉ូតូស្រាប់តែមានជនសង្ស័យ២នាក់ជិះម៉ូតូម៉ាក SIRIUS ពណ៌ក្រហម ពាក់ស្លាកលេខក្លែងក្លាយ ជិះឌុបគ្នាមកពីក្រោយក៏បានធ្វេីសកម្មភាពឆក់ទូរស័ព្ទIPhone 5 ពីកូនរបស់គាត់បានសម្រេច ។ ពេលនោះគាត់ក៏បានដេញតាមនិងស្រែកឆោឡោក៏ត្រូវបានប្រជាការពារឃាត់ខ្លួនបានម្នាក់ហេីយប្រជាពលរដ្ឋវាយម្នាក់មួយដៃមួយជើងទ្រមខ្លួន ចំណែកម្នាក់ទៀតរត់គេចខ្លួនបាត់។

ក្រោយមកសមត្ថកិច្ចបានចុះទៅដល់កន្លែងកេីតហេតុនាំជនសង្ស័យនិងម៉ូតូ រួមនិងជនរងគ្រោះទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចតុមុខ ដេីម្បីកសាងសំណុំរឿងចាត់ការតាមនីតិវិធី៕

ដោយ៖ ព្រែកជ័យ