អ្នកនាំពាក្យវិមានក្រឹមឡាំង លោក Dmitry Peskov បាននិយាយថា រុស្ស៊ីមិនបានធ្វើការសន្ទនាណាមួយជាមួយអតីតប្រធានាធិបតីអាមេរិក Donald Trump ទាក់ទងនឹងការដោះស្រាយជម្លោះនៅអ៊ុយក្រែននោះទេ។

ក្នុងរយៈពេលប៉ុន្មានខែថ្មីៗនេះ លោក Trump បានសន្យាម្តងហើយម្តងទៀតថានឹងជួយបញ្ចប់ជម្លោះរុស្ស៊ី-អ៊ុយក្រែនក្នុងរយៈពេលត្រឹមតែ 24 ម៉ោង ប្រសិនបើលោកត្រូវបានជាប់ឆ្នោតជាប្រធានាធិបតីសហរដ្ឋអាមេរិកម្តងទៀតនៅឆ្នាំ 2024។
លោក Trump ក៏បានអះអាងដែរថា លោកអាចបញ្ចប់ជម្លោះយ៉ាងឆាប់រហ័សដោយការចរចាជាមួយប្រធានាធិបតីអ៊ុយក្រែនលោក Volodymyr Zelensky និងប្រធានាធិបតីរុស្ស៊ីលោក Vladimir Putin ដើម្បីទាញយកចំណុចខ្សោយ និងចំណុចខ្លាំងរបស់ភាគី។ លោក Trump ក៏មិនបានច្រានចោលលទ្ធភាពដែលអ៊ុយក្រែនអាចនឹងត្រូវប្រគល់ទឹកដីមួយចំនួនទៅឲ្យរុស្ស៊ីដើម្បីឈានដល់កិច្ចព្រមព្រៀងសន្តិភាព។
យោងតាមទីភ្នាក់ងារសារព័ត៌មាន RT នៅពេលសួរថាតើវិមានក្រឹមឡាំងគិតយ៉ាងណាចំពោះការសន្យារបស់លោក Trump ក្នុងការបញ្ចប់ជម្លោះរុស្ស៊ី និងអ៊ុយក្រែនក្នុងអំឡុងពេលយុទ្ធនាការបោះឆ្នោត លោក Peskov បាននិយាយថាទីក្រុងម៉ូស្គូ “មិនដឹងពីរបៀបដើម្បីសម្រេចបាននូវរឿងនេះទេ។ មិនមានការទំនាក់ទំនងទាក់ទងនឹងបញ្ហានេះទេ»។
កាលពីសប្តាហ៍មុន ប្រធានាធិបតីអ៊ុយក្រែន លោក Zelensky ក៏បានលើកឡើងពីសេចក្តីថ្លែងការណ៍របស់លោក Trump និងបានបញ្ចេញមតិថា ការសន្យារបស់អតីតប្រធានាធិបតីអាមេរិក ស្តាប់ទៅ “គួរឱ្យខ្លាចបន្តិច”។ លោក Zelensky បាននិយាយថា លោក Trump មិនបានផ្តល់ព័ត៌មានលម្អិតណាមួយអំពីគំនិតផ្តួចផ្តើមផ្ទាល់ខ្លួននេះទេ ហើយបានសម្តែងការព្រួយបារម្ភថាគំនិតផ្តួចផ្តើមនេះអាចមានសក្តានុពលមិនអើពើផលប្រយោជន៍របស់អ៊ុយក្រែន៕

រូប​ថត​:Brookings