ភ្នំពេញ ៖ មានរថយន្ត Lexus HS 250h មួយគ្រឿង បានបេីកបុករះបង្គោលថ្មនិងដើមផ្កាលើសួនពុះចែកទ្រូងផ្លូវហើយក្រឡាប់ជាច្រេីនត្រឡប់រងការខូចខាតយ៉ាងដំណំ កាលពីវេលាម៉ោង ១ និង ៣០នាទីយប់រំលងអធ្រាត្រឈានចូលថ្ងៃទី ២៥ ខែមករា ឆ្នាំ ២០២៤ នៅតាមបណ្ដោយផ្លូវបុរីអង្គរ ស្ថិតក្នុងសង្កាត់ទួលសង្កែទី២ ខណ្ឌឫស្សីកែវ រាជធានីភ្នំពេញ។
យោងតាមប្រភពព័ត៌មានពីកន្លែង
កេីតហេតុបានឱ្យដឹងថា រថយន្តបង្កម៉ាក Lexus HS 250h ពណ៌ក្រហម ពាក់ផ្លាកលេខភ្នំពេញ2CA-1619 បានធ្វេីដំណេីរតាមបណ្ដោយផ្លូវបុរីអង្គរក្នុងទិសដៅពីត្បូងទៅជេីងដោយល្បឿនលឿន រួចបានបុករះបង្គោលថ្មចំនួន០១ និងដើមផ្កាលើសួនពុះចែកទ្រូងផ្លូវជាច្រេីនដេីមបណ្ដាលឲ្យរងការខូចខាត ខណៈដែលរថយន្តបង្កបានក្រឡាប់ជាច្រេីនត្រឡប់ខូចខាតយ៉ាងដំណំ ។ ក្នុងករណីនេះគេពុំដឹងថា
អ្នកបេីកបររងរបួសឬយ៉ាងណានោះទេ បន្ទាប់ពីកេីតហេតុ ពីព្រោះគេឃេីញតែរថយន្តបង្កនៅនឹងកន្លែងតែប៉ុណ្ណោះ។
ក្រោយមកសមត្ថកិច្ចមូលដ្ឋានបានចុះមកដល់ សហការជាមួយមន្ត្រីជំនាញចរាចរណ៍ធ្វើការវាស់វែងនិងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដេីម្បីរងចាំធ្វើការដោះស្រាយគ្នានៅពេលក្រោយ៕ដោយ ៖ ភារ៉ា ដង្កោ
