ខេត្តកំពង់ឆ្នាំង ៖ កាំភ្លើងអាការមួយមួយដើម ត្រូវបានប្រជាពលរដ្ឋប្រទះនៅចិញ្ចើមផ្លូវលំមួយកន្លែង ខណៈដែលពលរដ្ឋធ្វើដំណើរត្រឡប់មកពីផ្សារលក់ឥវ៉ាន់ ។ ហេតុការណ៍នេះត្រូវបានគេប្រទះឃើញកាលពីវេលាម៉ោង៨ និង៣០នាទីយប់ ថ្ងៃទី៧ ខែកុម្ភៈ ឆ្នាំ២០២៤ នៅភូមិទី៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ។
សមត្ថកិច្ចបានឱ្យដឹងថាប្រជាពលរដ្ឋ ដែលប្រទះឃើញកាំភ្លើងនេះមានឈ្មោះ ង្វៀង យ៉ាងទៀក ភេទប្រុស អាយុ៤៤ឆ្នាំ ជនជាតិវៀតណាម រស់នៅភូមិទី ៧ សង្កាត់ ខ្សាម លក់ ផាក់ឡូវ និង ពោះគោ ។ កាំភ្លើងដែលប្រទះឃើញម៉ាកអាការស្វាយបត់ មានបង់មួយ និង គ្រាប់កាំភ្លើងនៅក្នុងបង់នេះមានចំនួន៩គ្រាប់ ។
សមត្ថកិច្ចបានឱ្យដឹងថា កាលពីវេលាម៉ោង៨និង៣០នាទីយប់ថ្ងៃទី៧ ខែកុម្ភៈ ឈ្មោះង្វៀង យ៉ាងទៀក ជាជនជាតិវៀតណាម បានត្រឡប់មកពីលក់សាច់ផាក់ឡូវនៅផ្សារ ពេលមកដល់ កន្លែងចំណុចខាងលើ ឃើញមានចាំងនិងភ្លើងពិល ដែលកំាំភ្លើងនេះនៅក្នុងដើមកូនឈើរតូចៗ ពេលទៅមើលក៍ឃើញកាំភ្លើងនៅទីនោះ តែភ្លាមៗនោះលោកអត់បានលើកនោះទេ ក៍ជិះម៉ូតូចូលទៅផ្ទះ លុះព្រឹកឡើងវេលាម៉ោង១០និង៣០នាទីព្រឹកថ្ងៃទី៨ កុម្ភៈ គាត់បានរាយការណ៍ទៅនគរបាលប៉ុស្តិ៍ សង្កាត់ខ្សាម ដើម្បីចុះពិនិត្យ និង យកមករក្សាទុក ។
សមត្ថកិច្ចនគរបាលប៉ុស្ថិ៍បានឱ្យដឹងថាតាមការពិនិត្យកុសលបច្ច័យរបស់នគរបាលបច្ចេកទេស ក្រុង កាំភ្លើងនេះនៅមានគុណភាពប្រហែល ៥០% មានស្នាមប្រឡាក់ភក់នៅចុងកាណុងកាំភ្លើងផងដែរ។បច្ចុប្បន្នកាំភ្លើងនេះត្រូវ បានយកមករក្សាទុកនៅជំនាញបច្ចេកទេសនគបាលក្រុងកំពង់ឆ្នាំងដើម្បីស្រាវជ្រាវបន្តទៅតាមនីតិវិធី ៕ ចន្ថា 
