ក្លិបបាល់ទាត់ Middlesbrough ដែល ទើបតែឡើងពីក្របខ័ណ្ឌអង់គ្លេស Championship មកកាន់អង់គ្លេស Premier Leagueបានសម្រេចខ្ចីជើងខ្សែប្រយុទ្ធសញ្ជាតិ អេស្ប៉ាញ Alvaro Negredoពីក្រុម Valencia មកលេងពេញមួយរដូវកាល ។

ក្រុម Middlesbrough បានចេញសេច ក្តីថ្លែងការណ៍មួយថា “ក្លិបរបស់យើងត្រៀមខ្លួនក្នុងការពង្រឹងសមត្ថភាពសម្រាប់រដូវកាលថ្មីដោយបានចុះហត្ថលេខានាំយក ខ្សែប្រយុទ្ធ Alvaro Negredo ពីក្រុម Valencia CF ។ កីឡាករអន្តរជាតិអេស្ប៉ាញរូបនេះបានទទួលជោគជ័យនៅក្នុងក្រុមអេស្ប៉ាញកាលពីយ៉ូរ៉ូឆ្នាំ២០១២ហើយគាត់នឹងមក ចូលរួមជាមួយនឹងពួកយើងពេញមួយរដូវកាលតែម្តង”។

ចំណែកក្រុមValenciaក៏បានបញ្ជាក់ពីការចាកចេញរបស់កីឡាករ Negredoដែរ ដោយបានថ្លែងថា “យើងសូមជូនពរដល់គាត់ឲ្យជួបសំណាងល្អនៅក្នុងក្របខ័ណ្ឌ អង់គ្លេស Premier League”។

គួររំលឹកថា អតីតខ្សែប្រយុទ្ធរបស់ក្លិបManchester City វ័យ៣០ឆ្នាំរូបនេះត្រូវ បានក្រុម Valencia ខ្ចីជើងពីអង់គ្លេសពេញមួយរដូវកាលក្នុងឆ្នាំ២០១៤ ហើយបានទិញ ជាកីឡាករពេញសិទ្ធិនៅឆ្នាំបន្ទាប់ ប៉ុន្តែរូបគាត់មិនអាចបញ្ចេញថ្វីជើងល្អជួយក្រុម Valencia ទទួលបានជោគជ័យច្រើនឡើយដោយស៊ុតបាល់បានតែ៥គ្រាប់ក្នុងចំណោម២៥ប្រកួត៕

ដោយ៖ ដេវីត