ភ្នំពេញ៖  បុរសចំនួន៣នាក់បានរងរបួសធ្ងន់និងស្រាល ដោយសារតែពួកគេជិះម៉ូតូ២គ្រឿងបុកគ្នា  កាលពីវេលាម៉ោង ១១និង១០នាទីយប់ថ្ងៃទី២១ ខែកក្កដា ឆ្នាំ២០១៦ នៅលើកំណាត់ផ្លូវជាតិលេខ៤ មុខការ៉ាស់សាំងស៊ូគីម៊ិច ស្ថិតក្នុងភូមិអង្គកែវ សង្កាត់ចោមចៅ ខណ្ឌពោធិ៍សែនជ័យ ហើយត្រូវរថយន្តសង្គ្រោះដឹកជនរងគ្រោះទៅមន្ទីរពេទ្យអស់ មិនទាន់លើកម៉ូតូចេញពីកន្លែងកើតហេតុផង ក៏មានរថយន្តក្រុងដឹកអ្នកដំណើរពេញបើកមកយ៉ាងលឿន បានមកបុកកិនម៉ូតូមួយគ្រឿងជាប់ក្រោមអូសជាង១០០ម៉ែត្រទើបប្រជាពលរដ្ឋដេញឃាត់បានភ្លាមៗ។

តាមសាក្សីពីកន្លែងកើតហេតុបានឲ្យដឹងថា មុនពេលកើតហេតុគេឃើញបុរសម្នាក់ជិះម៉ូតូម៉ាកហុងដា សេ១២៥ ពណ៌ខ្មៅមួយគ្រឿងពាក់ស្លាកលេខ1AI-1536 ជិះតាមបណ្តោយផ្លូវជាតិលេខ៤ ទិសដៅពីកើតទៅលិចក្នុងល្បឿនលឿន ខណៈមកដល់កន្លែងកើតហេតុ បានឆ្លងផ្លូវមកខាងឆ្វេងដៃ ស្របពេលនោះក៏មានបុរស២នាក់ជិះឌុបគ្នាម៉ូតូមួយគ្រឿងម៉ាក ស្សុយស៊ីគីស្តេប ជិះទិសដៅច្រាស់គ្នាបាន ទៅបុកគ្នាពេញទំហឹងបណ្តាលឲ្យរងរបួសធ្ងន់២នាក់ស្រាលម្នាក់ ។ បន្ទាប់មកក៏មានរថយន្តគ្លីនិកឯកជនមកដឹកជនរងគ្រោះដែលធ្ងន់ទៅព្យាលបាល ហើយខណៈដែលជនរងគ្រោះទៅពេទ្យអស់នោះ ប្រជាពលរដ្ឋដែលនៅកន្លែងកើតហេតុ គាត់បានយកបាវសនិងមែកឈើមកដាក់ជាសញ្ញាសម្គាល់ព្រោះខ្លាចមានគ្រោះថ្នាក់ទៀត តែជៀសមិនផុត ក៏មានរថយន្តក្រុងដឹកអ្នកជនជាតិបរទេសពេញ ដែលធ្វើដំណើរពីក្រុងព្រះសីហនុ បើកតាមបណ្តោយផ្លូវជាតិ៤មកដល់ចំណុចកើតហេតុ បានទៅបុកនិងកិនម៉ូតូម៉ាកសង់សេ១២៥ដែលទុកនៅលើថ្នល់មិនទាន់មានសមត្ថកិច្ចមកវាស់វែង អូសម៉ូតូជាប់ក្រោយរថយន្តជាង១០០ម៉ែត្រ ហើយរថយន្តបានថយក្រោយវិញបន្តិចប្រុងបើករត់ តែត្រូវប្រជាពលរដ្ឋនៅកន្លែងកើតហេតុជួយឃាត់បាន។

ក្រោយពេលកើតហេតុជាងមួយម៉ោងប្រជាពលរដ្ឋព្រមទាំងសាច់ញាតិខាងម៉ូតូរងគ្រោះ មានការក្តៅក្រហាយជាមួយខាងរថយន្ត ក្រុងដោយមិនឲ្យអ្នកដំណើរបរទេសទាំងអស់ចាកចេញពីរថយន្តបង្កឡើយ ធ្វើយឺតយ៉ាវជើងឡើងយន្តហោះរបស់អ្នកដំណើរជនជាតិបរទេសថែមទៀត តែដោយមានការសម្របសម្រួលពីសមត្ថកិច្ច ទើបព្រមឲ្យយករថយន្តមួយគ្រឿងទៀតមកសាងធ្វើដំណើរបន្តទៀត ដោយឡែកម៉ូតូ២គ្រឿងនិងរថយន្តក្រុងយកទៅរក្សាទុកនៅការិយាល័យចរាចរណ៍ផ្លូវគោកនៃស្នងការនគរបាលរាជធានីភ្នំពេញ ដើម្បីធ្វើការដោះស្រាយ ៕

ដោយ៖ សុខាសែនជ័យ