ភ្នំពេញ៖ ខ្សែភាពយន្តរឿង វិស្សមកាលមរណៈ របស់ផលិតកម្ម ចក្រវាឡពេជ្រភាពយន្ត បានប្រកាសដាក់បញ្ចាំងនៅ៦រោងភាពយន្តទំនើបៗនៅភ្នំពេញ និងខេត្តសៀមរាបព្រមៗគ្នាបន្ទាប់ពីចំណាយការផលិតអស់រយៈពេលជាច្រើនខែ។ ការប្រកាសសម្ពោធដាក់បញ្ចាំងនេះត្រូវបានធ្វើឡើងកាលពីរាត្រីថ្ងៃទី២១ ខែកក្កដា ឆ្នាំ២០១៦នេះ នៅរោងភាពយន្ត Major Cineplex នៃផ្សារទំនើប Aeon Mall ក្រោមវត្តមានមន្ត្រីក្រសួងវប្បធម៌ ផលិតករ សិល្បករ និងអ្នកគាំទ្រជាច្រើនរូប។
ខ្សែភាពយន្តរបស់ផលិតកម្ម ចក្រវាឡពេជ្រភាពយន្តនឹងចាប់ផ្តើមដាក់បញ្ចាំងព្រមគ្នានៅគ្រប់រោងភាពយន្តទំនើបនៅភ្នំពេញ និងខេត្តសៀមរាបចាប់ពីថ្ងៃទី២៥ ខែកក្កដា ឆ្នាំ២០១៦ខាងមុននេះ។ នេះបើតាមការបញ្ជាក់របស់អ្នកស្រី ថុង ស៊ីវទៀង អគ្គនាយិការផលិតកម្ម ចក្រវាឡពេជ្រភាពយន្តដែលបានបញ្ជាក់ក្នុងពិធីសម្ពោធខាងលើ។ អ្នកស្រីបញ្ជាក់ដែរថា ខ្សែភាពយន្តនេះគឺមានគ្រប់រស់ជាតិ កំប្លែង ភ័យរន្ធត់ វាយតប់ កំសត់ជាដើម និងឆ្លុះបញ្ចាំងពីទិដ្ឋភាពមួយចំនួនរបស់សង្គមផងដែរ។ អ្នកស្រីបញ្ជាក់ថា ខ្សែភាពយន្តនេះបានផ្តិតយកទស្សនីយភាពស្រស់ត្រកាលនៃដងទន្លេមេគង្គ ទិដ្ឋភាពប្រាសាទបុរាណខ្មែរជាដើម និងត្រូវបានចំណាយការថតអស់រយៈពេល២ខែ និងការងារបច្ចេកទេជាច្រើនខែមុនពេលធ្វើការចាក់បញ្ចាំង។ លោកស្រីបន្តដែរថា ដោយការសម្រិតសម្រាំងផលិត និងតារាសម្តែងល្បីៗជាច្រើនចូលរួមសម្តែង ទើបខ្សែភាពយន្តនេះបានចំណាយការផលិតរហូតដល់៧ម៉ឺនដុល្លារអាមេរិក។ អ្នកស្រីរំពឹងដែរថា ទស្សនិកជននឹងជួយគាំទ្រលើកទឹកចិត្តដល់ផលិតករ សិល្បករ តាមរយៈការចូលទស្សនា ហើយអ្នកស្រីរំពឹងដែរថា នឹងទទួលបានការរិះគន់បែបស្ថាបនាដើម្បីបន្តផលិតខ្សែភាពយន្តបន្តនៅពេលដ៏ខ្លីខាងមុខនេះ។
លោក ថៃ ប៊ុននាង តួឯកក្នុងខ្សែភាពយន្តនេះបានបញ្ជាក់ថា លោកពិតជាមានអារម្មណ៍រីករាយក្នុងការចូលរួមសម្តែងក្នុងខ្សែភាពយន្តនេះ។ លោកថាការសម្តែង របស់សិល្បករទាំងអស់សុទ្ធតែជួបការលំបាកព្រោះតែត្រូវថតទាំងថ្ងៃក្តី និងយប់ជ្រៅ បូករួមទាំងការហ្វឹកហាត់វាយតប់អស់ជាច្រើនខែមុនពេលចាប់ផ្តើមការថតជាផ្លូវការ។ លោកថា សិល្បករទាំងអស់ពិតជារីករាយក្នុងការបង្កើតស្នាដៃថ្មីៗសម្រាប់បម្រើអារម្មណ៍ទស្សនិកជន ហើយលោករំពឹងថា ទស្សនិកជននឹងជួយគាំទ្រ និងលើកទឹកចិត្តដល់សិល្បករផលិតករដើម្បីបន្តច្នៃប្រឌិតស្វែងរកអ្វីដែលថ្មីសម្រាប់ទស្សនិកជន។
ប្រធាននាយកដ្ឋានភាពយន្ត នៃក្រសួងវប្បធម៌ និងវិចិត្រសិល្បៈ លោក ស៊ិន ចាន់សាយ៉ា ដែលបានចូលរួមក្នុងកម្មវិធីខាងលើបានថ្លែងការកោតសរសើរចំពោះសិល្បករ ផលិតករដែលព្យាយាមស្វែងរកខ្សែភាពយន្តថ្មីៗសម្រាប់ដាក់បញ្ចាំងនៅរោងភាពយន្តឲ្យទស្សនិកជនបានទស្សនា។ លោកបន្តថា ខ្សែភាពយន្តនេះពិតជាល្អព្រោះតែបានឆ្លុះបញ្ចាំង និងបង្ហាញពីទស្សនៈអប់រំមួយចំនួន។ លោកថា អ្វីដែលពិសេសគឺផលិតកម្មបានចូលរួមចំណែកផលិតខ្សែភាពយន្ត បង្កើតការងារសម្រាប់សិល្បករ និងជួយលើកកម្ពស់ អភិរក្សសិល្បៈក្បាច់គុណបុរាណខ្មែរជាដើម។ លោករំពឹងថា ទស្សនិកជននឹងជួយគាំទ្រដល់ខ្សែភាពយន្តខ្មែរ ដើម្បីជាការលើកទឹកចិត្តដល់សិល្បករ ផលិតករបន្តផលិតខ្សែភាពយន្តក្រោយទៀត៕
ដោយ៖ វឌ្ឍនា
