ភ្នំពេញ៖ រថយន្តសេរីទំនើបម៉ាក CITY មួយគ្រឿង បានបើកបរក្នុងល្បឿនយ៉ាងលឿន ហើយបួងចង្កូតបត់មិនទាន់ក៏ជ្រុលទៅបុកបង្គោលភ្លើងគៀបជាប់នៅនិងកន្លែងបណ្ដាលឲ្យរងការខូចខាតផ្នែកខាងមុខយ៉ាងដំណំ។

ហេតុការណ៍នេះបានកើតឡើងកាលពីវេលាម៉ោង១និង៥០នាទីរំលងអាធ្រាត្រឈានចូលថ្ងៃទី២២ ខែក្កដា ឆ្នាំ២០១៦ នៅចំណុចផ្លូវព្រះសីហនុ កែងនិងផ្លូវ៦៣ ស្ថិតក្នុងសង្កាត់បឹងកេងកង១ ខណ្ឌចំការមន ។

ប្រភពព័ត៌មានពីប្រជាពលរដ្ឋដែលឃើញហេតុការណ៍ខាងលើបានប្រាប់ឲ្យដឹងថា នៅមុនពេលកើតហេតុគេបានឃើញរថយន្តបង្កម៉ាកហុងដា CITY សេរីទំនើប ពណ៌ស ពាក់ស្លាកលេខ ភ្នំពេញ 2AG-1117 បានបើកបរតាមបណ្ដោយផ្លូវព្រះសីហនុ ទិសដៅពីកើតមកលិចក្នុងល្បឿនយ៉ាងលឿន ខណៈមកដល់កែងផ្លូវ៦៣ ក៏បួងចង្កូតបត់ឆ្វេងទាំងមិនបន្ថយល្បឿន ហើយបួងចង្កូតបត់មិនទាន់ក៏ជ្រុលទៅបុកបង្គោលភ្លើងនៅលើចញ្ចើមផ្លូវគៀបជាប់ទៅមុខលេងរួចបណ្ដាលឲ្យរងការខូចខាតផ្នែកខាងមុខយ៉ាងដំណំតែសំណាងល្អមិនមាននាក់រងរបួស។

ក្រោយពេលកើតហេតុម្ចាស់រថយន្តបង្កបានចុះគេចខ្លួនបាត់ចំណែករថយន្តបង្កត្រូវបានសមត្ថកិច្ចមូលដ្ឋានទំនាក់ទំនងហៅជំនាញមកស្ទូចយកទៅរក្សាទុកនៅការិយាល័យចរាចរណ៍ជើងគោករាជធានីដើម្បីរង់ចាំម្ចាស់ចូលខ្លួនទៅដោះស្រាយតាមក្រោយ៕

ដោយ៖ជីម ភារ៉ា ដង្កោ