ភ្នំពេញ៖ រថយន្ដកុងតឺន័រ១គ្រឿងរបស់ក្រុុមហ៊ុនផែស្ងួត សូងួន បើកបុកពីក្រោយរថយន្ដរបស់តារាកំប្លែងនាយខ្ចឹប ខណៈបត់ចូលផ្ទះបណ្តាលឲ្យបែកកញ្ចក់តែមិនមានអ្នករងរបួសនោះទេ។

ហេតុការណ៍គ្រោះថ្នាក់ចរាចរណ៍នេះកើតឡើងនៅយប់ថ្ងៃទី២២ ខែកក្កដា ឆ្នាំ២០១៦ នេះ តាមបណ្ដោយផ្លូវវេងស្រេង ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

សាក្សីដែលឃើញហេតុការណ៍បានឲ្យដឹងថា មុនពេលកើតហេតុគេឃើញរថយន្តមួយគ្រឿងម៉ាក Highlander ពាក់ស្លាកលេខ ភ្នំពេញ 2N-7886 បើកបរដោយតារាកំប្លែងនាយខ្ចឹប ធ្វើដំណើរតាមបណ្តោយផ្លូវវេងស្រេងក្នុងទិសដៅពីលិចទៅកើត លុះមកដល់ចំណុចខាងលើ រថយន្ដបានបត់ឆ្វេងគោលបំណងចូលផ្ទះ ពេលនោះស្រាប់តែមានរថយន្ដកុងតឺន័រមួយគ្រឿងរបស់ក្រុមហ៊ុនផែស្ងួតសូងួន មកបុកពីក្រោយពេញទំហឹងបណ្ដាលឲ្យរថយន្ដរបស់នាយខ្ចឹបបែកកញ្ចក់ខ្ទេច ប៉ុន្ដែមិនមានអ្នកណារងរបួសនោះទេ។

ក្រោយពេលកើតហេតុសមត្ថកិច្ចជំនាញការិយាល័យចរាចរណ៍ជើងគោករាជធានីភ្នំពេញធ្វើការវាសវែងយករថយន្ដទាំងពីរគ្រឿងទៅរក្សាទុករង់ចាំការដោះស្រាយតាមក្រោយ៕

ដោយ៖ សុខាសែនជ័យ