ខេត្តព្រៃវែង៖ តារាចម្រៀងដែលសកម្មនឹងការងារសង្គមលោក សន វិជ្ជបុត្រ បានចុះទៅចែកអំណោយជាសម្ភារៈសិក្សាមួយចំនួនសារជាថ្មីម្តងទៀតនៅសាលានាទឹកដីកំណើតខេត្តព្រៃវែង។ អំណោយជាសម្ភារៈសិក្សា និងកង់នៅពេលនេះគឺដើម្បីចូលរួមចំណែកលើកទឹកចិត្តដល់សិស្សដែលរៀនពូកែ និងដើម្បីតបស្នងសងគុណទៅទីកន្លែងដែលធ្លាប់ផ្តល់ចំណេះដឹងមកដល់លោកគ្រាដែលលោកធ្លាប់សិក្សានៅទីនោះ។
កម្មវិធីប្រគល់អំណោយជាសម្ភារៈសិក្សានៅពេលនេះត្រូវបានរៀបចំធ្វើពិធីនេះត្រូវបានប្រារព្ឋធ្វើឡើងកាលពីព្រឹកថ្ងៃទី២២ ខែកក្កដា ឆ្នាំ២០១៦ នៅក្នុងបរិវេនអនុវិទ្យាល័យធាយស្ថិតក្នុងភូមិតាសូរ ឃុំធាយ ស្រុកបាភ្នំ ខេត្តព្រៃវែង។
អំណោយដែលលោកបានចុះចែកដល់អនុវិទ្យាល័យខាងលើនេះដើម្បីលើកទឹកចិត្តដល់សិស្សដែលប្រឡងជាប់លេខ១ ពីថ្នាក់ទី៧ដល់ទី៩ ដោយទទួលបានកង់ម្នាក់១គ្រឿងព្រមទាំងមានសម្ភារៈមួយចំនួនទៀតមានកាបូប ប៊ិច សៀវភៅ ១.៥០០ក្បាល ច្រាសដុះធ្មេញ ២៥ប្រអប់ និងថវិកាជូនលោកគ្រូអ្នកគ្រូសរុបចំនួន ២៥ម៉ឺនរៀលផងដែរ។
លោក សន វិជ្ជបុត្រ បានថ្លែងថា លោកធ្លាប់សិក្សានៅសាលាបឋមសិក្សាមួយនេះតាំងពីតំបន់នេះមិនទាន់រីកចម្រើន ឯសាលារៀននេះក៏លំបាកទើបលោកមានគំនិតចង់ជួយសាលាមួយនេះឲ្យបានតាមលទ្ឋភាពស្របពេលដែលអនុវិទ្យាល័យនេះអាក់ខានបានជំនួញពីសប្បុរជននានាចំនួន៣ឆ្នាំមកហើយ។ លោកបន្តទៀតថា លោកចង់លើកទឹកចិត្តសិស្សដែលរៀនពូកែឲ្យមានចិត្តតស៊ូបន្តទៀតព្រមទាំងប្អូនៗផ្សេងទៀតខំរៀនយកគំរូតាមអ្នករៀនពូកែដើម្បីប្រទេសជាតិយើង។
តារាចម្រៀងដែលខំរិះរកគ្រប់មធ្យោបាយដើម្បីរកជំនួយមកជួយទុរគតជនរូបនេះបន្ថែមថា ការរៀបចំនូវរូបភាពបែបមនុស្សធម៌ដែលរំលេចឡើងជាបន្តបន្ទាប់នេះលោកមិនដែលគិតធ្វើបុណ្យចង់បានបុណ្យមកវិញនោះទេគឺលោកចង់ឃើញស្នាមញញឹមរបស់បងប្អូនខ្មែរដែលខំសាងអំពើល្អចង់ឲ្យខ្មែរចេះស្រឡាញ់គ្នាមិនចង់ឲ្យមានការរើសអើងគ្នានិងចង់ឲ្យខ្មែរចេះចែករំលែកពេលឃើញមានទុក្ខលំបាកប៉ុណ្ណោះនោះចិត្តរបស់លោកសប្បាយនឹងមានន័យណាស់ទៅហើយ។
លោកបន្តថា ក្រោយចប់កម្មវិធីនេះលោកក៏នៅតែមានសកម្មភាពនេះជាបន្តបន្ទាប់ទៀតដោយមិនទាន់បញ្ចប់ឡើយដរាបណាមានជនទីទ័លក្រនៅតែដង្ហើយហៅឲ្យលោកជួយនោះលោកនឹងបន្តរកជំនួញពីបងប្អូនសប្បុរសនានាទាំងក្នុងនិងក្រៅស្រុកជួយមិនឲ្យខកចិត្តឡើយក្រៅពីចង់ទុកស្នាដៃល្អៗអំពើល្អក្នុងសង្គមប៉ុណ្ណោះ។
ជាមួយគ្នានេះលោកសូមថ្លែងអំណរគុណដល់សប្បុរជនរួមមាន អ្នកនាង លីនដា និងក្រុមគ្រួសារនៅអាមេរិក លោក Jenny Chhum និងក្រុមគ្រួសារនៅសហរដ្ឋអាមេរិក កញ្ញាអាម៉ីតារាសម្តែង កញ្ញា ចាន់ ឡុង តារាសម្តែង ស្រីអូនអាជីវករនៅសៀមរាប អ្នកម្តាយចិត្តធម៌នៅផ្សារអូឡាំពិក មីងអាជីវករនៅផ្សារអូឬស្សីជាដើម ដែលតែងលើកទឹកចិត្តនិងជួយជាថវិការសម្រាប់សកម្មភាពមនុស្សធម៌នានាផងដែរ៕
ដោយ៖ វឌ្ឍនា
