ភ្នំពេញ៖ ជនសង្ស័យ៣នាក់ត្រូវបានកម្លាំងកងរាជអាវុធហត្ថខណ្ឌសែនសុខ ធ្វើការឃាត់ខ្លួនខណៈដែលពួកគេលាក់ទុកថ្នាំញៀន៤កញ្ចប់តូចជាប់ខ្លួន។
ករណីឃាត់ខ្លួនជនសង្ស័យទាំង៣នាក់ខាងលើនេះធ្វើឡើងកាលពីវេលាម៉ោង១២និង៤០នាទីយប់ឈានចូលថ្ងៃទី២៣ ខែកក្កដា ឆ្នាំ ២០១៦ នៅចំណុចជាប់ហាងខារ៉ាអូខេ យូធី តាមបណ្ដោយផ្លូវ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មានពីកម្លាំងអាវុធហត្ថបានឲ្យដឹងថា ជនសង្ស័យទាំង៣នាក់ដែលឃាត់ខ្លួននោះទី១-ឈ្មោះ វ៉ាន់ សុភក្ដិ អាយុ២៥ឆ្នាំ មុខរបរកម្មករសំណង់ ស្នាក់នៅផ្ទះជួលម្ដុំបូរីសែនមនោរម្យ ស្ថិតក្នុងសង្កាត់ចោមចៅ ខណ្ឌពោធិ៏សែនជ័យ ទី២-ឈ្មោះ ដន រតនា អាយុ២៦ឆ្នាំ និងទី៣-ឈ្មោះ សុខ ធឿន អាយុ៣៦ឆ្នាំ អ្នកទាំងពីរមានមុខរបរជាកម្មករសំណង់ ស្នាក់នៅផ្ទះជួលម្ដុំផ្សាព្រៃទា ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ។
ប្រភពដដែលបានបន្តទៀតថា មុននិងឃាត់ខ្លួនជនសង្ស័យទាំង៣នាក់ខាងលើគឺកម្លាំងកងរាជអាវុធហត្ថខណ្ឌសែនសុខបានសហការណជាមួយនិងកម្លាំងកងរាជអាវុធហត្ថក្រុងដាក់គោលដៅត្រួតពិនិត្យអាវុធជាតិផ្ទុះនៅចំណុចខាងលើហើយក៏ឃើញពួកគេជិះម៉ូតូ១គ្រឿងម៉ាកស្មាស់រេវ៉ូ ពណ៌ខ្មៅ ពាក់ស្លាកលេខ តាកែវ 1C-3586 មានគ្នា៣នាក់តែពេលដែលឃើញកម្លាំងសមត្ថកិច្ចស្រាប់តែយុវជនម្នាក់ដែលជិះនៅខាងក្រោយបានលោតចុះពីលើម៉ូតូបំណងរត់គេចខ្លួនតែត្រូវកម្លាំងអាវុធហត្ថឃាត់ខ្លួនធ្វើការឆែកឆេរក៏រកឃើញថ្នាំញៀនចំនួន៤កញ្ចប់តូចនៅជាប់ខ្លួនទើបកម្លាំងអាវុធហត្ថធ្វើការឃាត់ខ្លួនរួមនិងម៉ូតូ១គ្រឿងតែម្តង។
ក្រោយពេលកើតហតុជនសង្ស័យទាំងបីនាក់រួមនិងវត្ថុតាងត្រូវបញ្ជូនទៅកាន់មូលដ្ឋានកងរាជអាវុធហត្ថខណ្ឌសែនសុខដើម្បីសាកសួរនិងកសាងសំណុំរឿងបញ្ជូនទៅកាន់ទីបញ្ជាការកងរាជអាវុធហត្ថរាជធានីភ្នំពេញចាត់ការបន្តតាមនីតិវិធី៕
ដោយ៖ តុង សីហា
