ភ្នំពេញ៖ សាលាខេមប្រ៊ីជ ឆាល៍ឌីវេឡុបមេនសេនធ័រ និងសាលាខេមប្រ៊ីជអន្តរជាតិកម្ពុជាបានប្រារព្ធពិធីប្រគល់វិញ្ញាបនបត្រ និងលិខិតសរសើរប្រចាំឆ្នាំ ដល់សិស្សានុសិស្សដែលត្រូវបញ្ចប់ការសិក្សាត្រូវបានទទួលស្គាល់ចំពោះសមិទ្ធិផលនិងការខិតខំរបស់ខ្លួនក្នុងរយៈពេលមួយឆ្នាំសិក្សានេះ។ កម្មវិធីនេះត្រូវបានធ្វើឡើងនៅព្រឹកថ្ងៃទី២៣ ខែកក្កដា ឆ្នាំ២០១៦ នេះនៅសាលធំរបស់មជ្ឈមណ្ឌលសហប្រតិបត្តការកម្ពុជា-កូរ៉េ ក្រោមវត្តមានអាណាព្យាបាលជាច្រើនរូបចូលរួម។

ការបើកកម្មវិធីជាមួយនឹងការដង្ហែរក្បួនរបស់សិស្សានុសិស្សការសម្តែងទស្សនីយភាពយន្តសិល្បៈ និងការឡើងថ្លែងពីចំណាប់អារម្មណ៍របស់ពួកគេចំពោះការសិក្សា ក្រុមគ្រួសារ និងបំណងរបស់ពួកគេនៅថ្ងៃអនាគត់។

លោកស្រី Joanne Lorena នាយកនៃសាលា Cambridge CDC និង Cambridge ISC ថា «យើងមានមោទនភាពយ៉ាងខ្លាំងចំពោះអ្វីដែលកុមារនិងគ្រូរបស់យើងបានសម្រេចនៅក្នុងឆ្នាំនេះ។ ថ្ងៃនេះជាថ្ងៃសម្រាប់ក្រុមគ្រួសារនិងសហគមន៍របស់យើងក្នុងការទទួលស្គាល់ការខិតខំប្រឹងប្រែងរៀនសូត្រដែលសិស្សរបស់យើងបានធ្វើ ។ យើងកំពុងតែសម្លឹងឆ្ពោះទៅមុខដើម្បីរកនៅកម្មវិធីសិក្សាល្អៗ និងទំនើបៗធ្វើយ៉ាងណាឲ្យសិស្សរបស់យើងកាន់តែមានគុណភាព និងកាន់តែច្រើនក្នុងឆ្នាំសិក្សាខាងមុខទៀត»។

គួរបញ្ជាក់ដែរថា ខេមប្រ៊ីជ ឆាល៍ឌីវេឡុបមេនសេនធ័រ ជាសាលាមត្តេយ្យបីភាសាដែលទទួលបានសិទ្ធិផ្តាច់មុខរបស់ ប្រទេសសិង្ហបុរី មុនដំបូងគេនៅក្នុងប្រទេសកម្ពុជា ដែលមានទទួលកុមារចាប់ពីអាយុ២ខែដល់អាយុ ៦ឆ្នាំ។ ខេមប្រ៊ីជ ឆាល៍ឌីវេឡុបមេនសេនធ័រ មានទីតាំងស្ថិតនៅផ្លូវលេខ៣០២ សង្កាត់បឹងកេងកងទី១ ខណ្ឌចំការមន រាជធានីភ្នំពេញ។

មិនតែប៉ុណ្ណោះសាលា ខេមប្រ៊ីជអន្តរជាតិកម្ពុជា ត្រូវបានផ្តល់អាជ្ញាប័ណ្ណដោយ ក្រសួងអប់រំចាប់តាំងពីឆ្នាំ២០១២ ដែលប្រើកម្មវិធីសិក្សាមូលដ្ឋាននៅចក្រភពអង់គ្លេស ជាកម្មវិធីបឋមសិក្សាអន្តរជាតិ (IPC) ដែលកំពុងត្រូវបានគេប្រើនៅក្នុងជាង៦៥ បណ្តាប្រទេសនៅទូទាំងពិភពលោក។ ភាសាចិនជា ភាសាទី២ នៅសាលាខេមប្រ៊ីជអន្តរជាតិកម្ពុជា ដែលសិក្សាតាមកម្មវិធី ODONATA ដែលមានមូលដ្ឋាននៅប្រទេសម៉ាឡេស៊ី ។

សាលា ខេមប្រ៊ីជអន្តរជាតិកម្ពុជាមានទីតាំងស្ថិតនៅផ្ទះលេខ៥៦ ផ្លូវ៣០២ សង្កាត់បឹងកេងកង១ ខណ្ឌចំការមន រាជធានីភ្នំពេញ៕

ដោយ៖ វឌ្ឍនា