ភ្នំពេញ៖ ការប្រកួតបាល់ទាត់ដណ្ដើមជើងឯកប្រចាំតំបន់អាស៊ីអាគ្នេយ៍ AFF Suzuki Cup 2016 ដែលកម្ពុជាធ្វើជាម្ចាស់ ផ្ទះនៅវគ្គជម្រុះបឋមហើយមីយ៉ាន់ម៉ាជាមួយហ្វុីលីពីនធ្វើជាម្ចាស់ផ្ទះរួមនៅជុំជម្រុះចុង ក្រោយបានបង្ហាញពីកាលបរិច្ឆេទប្រកួតជុំចុងក្រោយហើយ ដោយចាប់ផ្ដើមប្រកួតនៅអំឡុងពាក់កណ្ដាលខែវិច្ឆិកា ឆ្នាំ២០១៦ ខាងមុខនេះ។

ការប្រកួតនៅជុំជម្រុះចុងក្រោយនឹងត្រូវចាប់ផ្ដើមប្រកួតពីថ្ងៃទី១៩រហូតដល់ថ្ងៃទី ២៦ ខែវិច្ឆិកា ឆ្នាំ២០១៦ ដោយធ្វើការប្រកួតនៅប្រទេសមីយ៉ានម៉ាជាម្ចាស់ផ្ទះពូលA និងប្រទេសហ្វុីលីពីនជាម្ចាស់ផ្ទះពូលBសម្រាប់វគ្គជម្រុះក្នុងពូល និងការប្រកួតនៅវគ្គពាក់កណ្ដាលផ្ដាច់ព្រ័ត្រ និងវគ្គផ្ដាច់ព្រ័ត្រនឹងត្រូវ ប្រកួតចាប់ពីថ្ងៃទី៣ ខែធ្នូ ហើយបញ្ចប់នៅ ថ្ងៃទី១៧ ខែធ្នូ ឆ្នាំ២០១៦ ដោយធ្វើការ ប្រកួតតាមរូបមន្តក្នុងទឹកដីនិងក្រៅទឹកដី (Home/Away)។

គួរបញ្ជាក់ថា ការប្រកួតជុំជម្រុះបឋម ដែលកម្ពុជាធ្វើជាម្ចាស់ផ្ទះនឹងត្រូវប្រកួត ចាប់ពីថ្ងៃទី១៥ ខែតុលារហូតដល់ថ្ងៃទី២១ ខែតុលា ឆ្នាំ២០១៦ ដែលមាន៤ប្រទេស គឺម្ចាស់ផ្ទះកម្ពុជា ឡាវ ប្រុ៊យណេ និងទីម័រ ខាងកើតក្រុមដែលឈរនៅលើគេនឹងបានកៅអីដើម្បីឡើងទៅប្រកួតជុំចុងក្រោយ ។ ជុំចុងក្រោយមាន ក្រុមថៃ វៀតណាម ម៉ាឡេស៊ី ហ្វុីលីពីន ឥណ្ឌូណេស៊ី មីយ៉ាន់ម៉ា និងសិង្ហបុរី ដែលកំពុង អង្គុយចាំ៕

ដោយ៖ សារីម