ភ្នំពេញ៖ នារីម្នាក់បានពឹងបុរសម្នាក់ដែលធ្លាប់ស្គាល់គ្នាឌុបទៅរកប្អូននៅរោងចក្រខណៈទៅដល់នារីនោះក៏ចុះពីលើម៉ូតូឡើងទៅរកប្អូនចុះមកវិញបាត់ទាំងម៉ូតូទាំងមនុស្សទើបរត់ទៅប្តឹងនគរបាលប៉ុស្តិ៍ចោមចៅ កាលពីវេលាម៉ោង១១និង១៥នាទីព្រឹកថ្ងៃទី២៧ ខែកក្កដា ឆ្នាំ២០១៦ ស្ថិតនៅមុខរោងចក្រតៃវ៉ាន់ ផ្លូវវេងស្រេង ភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ ។

ជនរងគ្រោះ ឈ្មោះ ខឿន ស្រីមុំ អាយុ២៣ឆ្នាំ មុខរបរកម្មការិនីរោងចក្រ ស្នាក់នៅផ្ទះជួល ភូមិជ្រៃកោង សង្កាត់ចោមចៅ ក្បែរកន្លែងកើតហេតុ និងមានស្រុកកំណើត ភូមិស្នាយពល ឃុំរកា ស្រុកពារាំង ខេត្តព្រៃវែង ។ ចំណែកម៉ូតូដែលជនសង្ស័យជិះគេចទៅបាត់ ម៉ាកហុងដា សេ១២៥ ពណ៌ខ្មៅ ស៊េរី២០១៤ ពាក់ស្លាកលេខ ភ្នំពេញ 1CE-6074 ។

តាមសម្តីនារីរងគ្រោះបានឲ្យដឹងថា មុនកើតហេតុខ្លួនដែលធ្វើការនៅរោងចក្រផ្សេង ចេញពីធ្វើការដល់បន្ទប់ជួលមិនទាន់ឃើញប្អូនស្រីមកដល់បន្ទប់ នឹងហូបបាយជុំគ្នា រួចក៏ពឹងឲ្យបុរសម្នាក់ឈ្មោះ តាន់ អាយុជាង២០ឆ្នាំ ជាអ្នករួមការងារនៅរោងចក្រជាមួយគ្នា ស្នាក់នៅភូមិចោមចៅ សង្កាត់ចោមចៅ តែមិនស្គាល់ស្រុកកំណើត ឬអត្តសញ្ញាណឲ្យច្បាស់លាស់ឡើយ ដើម្បីឌុបជូនខ្លួនទៅទទួលប្អូនចេញពីរោងចក្រ តៃវ៉ាន់ នៅផ្លូវវេងស្រេង។ លុះដល់រោងចក្រហើយ ឲ្យបុរសខាងលើ ឈប់ចតម៉ូតូខាងមុខរោងចក្រ ហើយខ្លួនចូលទៅក្នុងរោងចក្រ ឡើងទៅតាមហៅប្អូននៅជាន់ទី១ រហូតចុះមកវិញស្រាប់តែបាត់បុរសខាងលើទាំងម៉ូតូទាំងមនុស្ស ជិះចេញទៅបាត់ទើបនាំគ្នាស្រឡាំងកាំងចុចទូរស័ព្ទអត់ចូលទៀត ។ តាមការសាកសួរ អ្នកលក់ដូរ នៅមុខរោងចក្របានឲ្យដឹងថា ក្រោយពីនារីរងគ្រោះដើរចូលក្នុងរោងចក្រ បុរសរូបនោះក៏ជិះម៉ូតូចេញទៅដែរ ដោយពុំមានអ្នកណាចាប់អារម្មណ៍ស្មានតែសាច់ញាតិ ។

នារីរងគ្រោះដោយសារតែចាំបាត់ៗឈឹង អស់សង្ឃឹមដឹងថាម៉ូតូត្រូវគេឆបោកយកទៅបាត់ហើយក៏បានរត់ទៅប្តឹងនគរបាលប៉ុស្តិ៍ចោមចៅ ឲ្យជួយស្រាវជ្រាវ៕

ដោយ៖ សុខាសែនជ័យ