ខេត្តកណ្តាល៖ បុរស២នាក់ត្រូវបានសមត្ថកិច្ចនគរបាលស្រុកពញាឮចាប់ខ្លួនរួមជាមួយថ្នាំញៀនប្រភេទមេតំហ្វេតាមីនចំនួន២០កញ្ចប់,អាវុធ៣ដើម និងវត្ថុតាងពាក់ព័ន្ធមួយចំនួនទៀត ដើម្បីកសាងសំណុំរឿងបញ្ជូនទៅកាន់សាលាដំបូងខេត្តកណ្តាលនៅព្រឹកថ្ងៃទី២៨ ខែកក្កដា ឆ្នាំ២០១៦ ដើម្បីចាត់ការតាមនីតិវិធីច្បាប់ ។

ប្រតិបត្តិការឃាត់ខ្លួនជនជួញដូរគ្រឿងញៀនធ្វើឡើង កាលពីវេលាម៉ោង៤ និង៤០នាទីរសៀលថ្ងៃទី២៧ ខែកក្កដា ឆ្នាំ២០១៦ ស្ថិតក្នុងភូមិធម្មត្រ័យ ឃុំផ្សារដែក ស្រុកពញាឮ រឹបអូសវត្ថុតាងរួមមាន៖ គ្រឿងញៀនប្រភេទមេតំហ្វេតាមីន ហៅម៉ាទឹកកកចំនួន២០កញ្ចប់, ដាវចំនួណ១ដើម, កាំភ្លើងច្នៃ១ដើម,ស្នា១ដើម,ឧបករណ៍សម្រាប់វេចខ្ចប់ និងសម្ភារសម្រាប់សេពគ្រឿងញៀនមួយចំនួនទៀត ។

មន្ត្រីនគរបាលប្រឆាំងគ្រឿងញៀនស្រុកពញាឮបានឲ្យដឹងថា បុរស២នាក់ដែលត្រូវបានចាប់ខ្លួននោះ ទី១-ឈ្មោះ ប៊ុន សិរីវុត្ថា ភេទប្រុស អាយុ២៨ឆ្នាំ ជនជាតិខ្មែរ មុខរបរ កម្មករសំណង់ ទី២-ឈ្មោះ វង់ ពិសិទ្ធ ហៅព្រិច ភេទប្រុស អាយុ២៣ឆ្នាំ ជនជាតិខ្មែរ មុខរបរ កម្មករសំណង់ ។ មុខសញ្ញាជួញដូរគ្រឿងញៀនខាងលើនេះមានទីលំនៅភូមិធម្មត្រ័យ ឃុំផ្សារដែក ស្រុកពញាឮ ។

ប្រភពដដែលបន្តថា មុខសញ្ញាជួញដូរគ្រឿងញៀនខាងលើនេះ ជាមុខសញ្ញាចាស់ដែលសមត្ថកិច្ចប៉ូលិសកំណត់ និងតាមដានដោយសម្ងាត់ជាយូរណាស់មកហើយ ។ លុះមកដល់យប់ថ្ងៃទី២៧ ខែកក្កដា ឆ្នាំ២០១៦ សមត្ថកិច្ចទទួលបានព័ត៌មានថា មុខសញ្ញាខាងលើនេះធ្វើសកម្មភាពជួញដូរគ្រឿងញៀនទៅឲ្យអ្នកប្រើប្រាស់ ទើបសមត្ថកិច្ចចុះចាំឃ្លាំមើលរហូតឈានដល់ឃាត់ខ្លួនជនល្មើសខាងលើនេះរួមជាមួយវត្ថុតាងជាក់ស្តែង ដើម្បីចាត់ការតាមច្បាប់ ៕

ដោយ៖ ស្អាងជ័យ