ខេត្តកណ្តាល៖ ព្រោះតែខឹងប្រពន្ធដែលទើបរៀបការជាមួយគ្នាបាន២ខែ មិនព្រមទៅលេងផ្ទះឪពុកម្តាយតាមការបបួល ក៏ផ្ទុះកំហឹងស្ទុះចាប់បោចសក់ប្រពន្ធអូសចូលក្នុងផ្ទះលោកឪពុកធម៌ដាល់ជាច្រើនដៃ បណ្តាលឲ្យរងរបួសហើមភ្នែកខាងស្តាំយ៉ាងធ្ងន់ធ្ងរ ។

ករណីប្រើអំពើហិង្សានេះបានកើតឡើងកាលពីវេលាម៉ោង៤ និង៣០នាទីរសៀលថ្ងៃទី២៧ ខែកក្កដា ឆ្នាំ២០១៦ ស្ថិតក្នុងភូមិអញ្ជែងលើ ឃុំពុកឬស្សី ស្រុកខ្សាច់កណ្ដាល ខេត្តកណ្តាល។

មន្ត្រីនគរបាលស្រុកខ្សាច់កណ្តាលបានឲ្យដឹងថា ជនដៃដល់ជាប្តីដែលត្រូវបានសមត្ថកិច្ចចាប់ខ្លួននោះមានឈ្មោះ ផ្លាយ សំណាង ភេទប្រុស អាយុ៣៩ឆ្នាំ ជនជាតិខ្មែរ មុខរបរកសិករ ។ ចំណែកឯស្ត្រីជាប្រពន្ធឈ្មោះ វី ស្រីពៅ ភេទស្រី អាយុ២២ឆ្នាំ មុខរបរកសិករ (រងរបួសភ្នែកខាងស្តាំហើមជាំ) ។ ទាំង២នាក់នេះបច្ចុប្បន្នរស់នៅក្នុងភូមិឈូក ឃុំសន្លុង ស្រុកខ្សាច់កណ្តាល ខេត្តកណ្តាល ។

ប្រភពដដែលបានបន្តថា នៅមុនពេលកើតហេតុប្រហែល២ខែ ជនដៃដល់និងស្ត្រីរងគ្រោះ បានចាប់ដៃគ្នាជាប្តីប្រពន្ធដោយបានរៀបមង្គលការត្រឹមត្រូវតាមប្រពៃណី ។ លុះមកដល់ថ្ងៃទី២៥ ខែកក្កដា ឆ្នាំ២០១៦ ជនដៃដល់ជាប្តីបានបបួលប្រពន្ធជិះម៉ូតូទៅលេងផ្ទះឪពុកធម៌ឈ្មោះ ម៉ុល នៅភូមិអញ្ជែងលើ ឃុំពុកឬស្សី ស្រុកខ្សាច់កណ្តាល ។ ពេលទៅដល់ផ្ទះលោកឪពុកធម៌ប្តីប្រពន្ធ២នាក់នេះបានស្នាក់នៅទីនោះរយៈពេល២យប់ រហូតដល់រសៀលថ្ងៃទី២៧ ខែ/ឆ្នាំដដែលជនដៃដល់មានសភាពស្រវឹងស្រាបានបបួលស្ត្រីរងគ្រោះទៅលេងផ្ទះឪពុកម្តាយបង្កើតរបស់ខ្លួនបន្តទៀត ។ ដោយឃើញបុរសជាប្តីមានសភាពស្រវឹងខ្លាចជិះម៉ូតូជួបគ្រោះថ្នាក់ ប្រពន្ធបានប្រកែកមិនព្រមទៅតាមការបបួល ជាហេតុធ្វើឲ្យបុរសជាប្តីកើតក្តីខឹងសម្បាយ៉ាងខ្លាំង ស្រែកឡូឡាបង្កជម្លោះជាមួយស្ត្រីរងគ្រោះរហូតឈានដល់ប្រើអំពើហិង្សាចាប់បោចសក់ប្រពន្ធអូសចូលទៅក្នុងផ្ទះឪពុកធម៌វាយជាច្រើនដៃ បណ្តាលឲ្យរងរបួសបែកភ្នែកខាងស្តាំហើមជាំ និងមានឈាមហូរមើលទៅគួឲ្យរន្ធត់ ។

ប្រភពដដែលបានបន្តទៀតថា ក្រោយពីមានហេតុការណ៍កើតឡើងជនដៃដល់ ត្រូវបានសមត្ថកិច្ចប៉ូលិសមូលដ្ឋានចាប់ខ្លួនបញ្ជូនទៅកាន់អធិការដ្ឋាននគរបាលស្រុកខ្សាច់កណ្តាល ដើម្បីកសាងសំណុំរឿងចាត់ការតាមច្បាប់ រីឯស្ត្រីជាប្រពន្ធត្រូវបានក្រុមគ្រួសារសាច់ញាតិ បញ្ជូនទៅសង្រ្គោះនៅមន្ទីរពេទ្យប្រតិបត្តិស្រុកខ្សាច់កណ្តាលផងដែរ ៕

ដោយ៖ ស្អាងជ័យ