ភ្នំពេញ៖ កម្លាំងព្រហ្មទណ្ឌកំរិតស្រាលសហការជាមួយនគរបាលខណ្ឌចំនួន៣ក្នុងរាជធានីភ្នំពេញបានឃាត់ខ្លួនមុខសញ្ញាចោរឆក់៧នាក់ និងម៉ូតូ៤គ្រឿង ក្នុងផ្ទះសំណាក់ លីហ្សា កាលពីវេលាម៉ោង១ រសៀលថ្ងៃទី៣០ ខែកក្កដា ឆ្នាំ២០១៦ ស្ថិនៅផ្ទះសំណាក់យីហោ លីហ្សា តាមបណ្តោយផ្លូវផ្សារ៥ ក្នុងសង្កាត់ទួលសង្កែ ខណ្ឌឫស្សីកែវ។

បើតាមសម្ដីពីសមត្ថកិច្ចបានបង្ហើបប្រាប់ថា ជនសង្ស័យដែលត្រូវសមត្ថកិច្ចឃាត់ខ្លួន៧នាក់នេះ ដោយសារតែកម្លាំងជំនាញព្រហ្មទណ្ឌខណ្ឌ៧មករាបានស៊ើបនិងស្រាវជ្រាវ រហូតមកដល់ចំណុតកើតហេតុខាងលើក៏បានធ្វើការរាយការណ៍ទៅជូនថ្នាក់លើ និងការសហការខណ្ឌចំនួន៣ គឺខណ្ឌចំការមន ខណ្ឌ៧មករា និងខណ្ឌទួលសង្កែ ឆ្មក់ចូលបង្ក្រាបក្រុមចោរឆក់ដែលសំងំក្នុងផ្ទះសំណាក់ខាងលើ ជាលទ្ធផលឃាត់ខ្លួនបានមនុស្ស៧នាក់ ក្នុងនោះប្រុស៦ ស្រីម្នាក់ រួមនឹងម៉ូតូ៤គ្រឿងជាក់ស្តែង។

បច្ចុប្បន្នជនសង្ស័យទាំង៧នាក់ និងម៉ូតូត្រូវបានកម្លាំងព្រហ្មទណ្ឌនៃស្នងការរាជធានីភ្នំពេញបញ្ជូនទៅសាកសួរ៕

ដោយ៖ ស រស្មី