ភ្នំពេញ ៖ រថយន្តកូរ៉េមួយគ្រឿងដឹកនំយកទៅដាក់ឱ្យម៉ូយបានក្រឡាប់ផ្ងារជើង ចាក់នំបញ្ចុកចោលពេញផ្លូវ ខណៈជួបគ្រោះថ្នាក់ចរាចរណ៍ ត្រូវបានរថយន្ត បើកលឿនបញ្ច្រាសទិសគ្នាវ៉ាជែងជ្រុលបុកពេញទំហឹង។

ហេតុការណ៍គ្រោះថ្នាក់ចរាចរណ៍នេះបានកើតឡើងកាលពី ៣និង៣០នាទីទៀបភ្លឺ ថ្ងៃទី២២ ខែកក្កដា ឆ្នាំ២០២៤ នៅតាមផ្លូវ៣០ម៉ែត្រ ចំណុចភូមិ២៤ សង្កាត់ព្រៃស ខណ្ឌដង្កោ រាជធានីភ្នំពេញ ។

ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុ គេឃើញរថយន្តLexus GS300 ពណ៌ស ពាក់ស្លាកលេខ ភ្នំពេញ 2AM-3289 បើកបរដោយបុរសម្នាក់ យ៉ាងលឿនក្នុងទិសដៅពីជើងទៅត្បូង ខណៈមកដល់ចំណុចកើតហេតុ វ៉ាជែងម៉ូតូកង់បី ជ្រុលចូលគន្លងផ្លូវ ម្ខាងទៀត ទៅបុករថយន្តម៉ាកហុីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 2BJ-5251 បើកដោយបុរសម្នាក់ រួមដំណើរជាមួយប្រពន្ធ ដឹកនំបញ្ចុក ដើរដាក់ឱ្យម៉ូយនៅផ្សារទួលពង្រ ដែលកំពុងបើកពីត្បូងទៅជើង បណ្តាលឱ្យក្រឡាប់ ចាក់នំបញ្ចុកចោលពេញផ្លូវ រីឯអ្នកបើកបររថយន្តLexus បានគេចខ្លួនបាត់ ។

បន្ទាប់ពីកើតហេតុ សមត្ថកិច្ចចុះទៅអន្តរាគមន៍ ស្ទូចយករថយន្តទៅរក្សាទុកនៅផ្នែកជំនាញខណ្ឌ រង់ចាំភាគីទាំងសងខាងដោះស្រាយគ្នាពេលក្រោយ ៕ជ្រោយពេជ្រ