ភ្នំពេញ៖ រថយន្តឡិចស៉ីសមួយគ្រឿងបំពាក់ហ្គាសដេីម្បីរត់តាកស៉ី ខណៈកំពុងបេីកបរដឹកជនជាតិចិន៣នាក់ស្រាប់តែភ្លេីងបារីផ្ទុះឆាបឆេះរបួសធ្ងន់ជនជាតិចិនទាំង៣នាក់ ចំណែកម្ចាស់រថយន្តជាជនជាតិខ្មែររបួសស្រាល។
ហេតុការណ៍នេះបង្កការភ្ញាក់ផ្អេីលកាលពីវេលាម៉ោង១១និង៣០នាទីព្រឹក ថ្ងៃទី២៣ ខែកក្កដា ឆ្នាំ២០២៤ នៅចំណុចភ្លើងស្តុបមុខសាលាបឋមសិក្សាហ៊ុនសែន ជម្ពូវ័ន ផ្លូវជាតិលេខ៤ ក្នុងភូមិព្រៃព្រីងជេីង២ សង្កាត់ចោមចៅទី៣ ខណ្ឌពោធិ៍សែនជ័យ។
តាមប្រភពព័ត៌មានបានឱ្យដឹងថា មុនពេលកេីតហេតុគេបានឃេីញរថយន្តឡិចស៉ីសRX300 ពណ៌ស្ក ពាក់ស្លាកលេខភ្នំពេញ2AQ-9519 ជាប្រភេទឡានតាក់ស៉ី ធ្វេីដំណេីរតាមបណ្តោយផ្លូវជាតិលេខ៤ ក្នុងទិសដៅពីកេីតទៅលិច ខណៈមកដល់ចំណុចកេីតហេតុស្រាប់តែផ្ទុះឆេះបណ្តាលឱ្យបុរសជនជាតិចិនចំនួន៣នាក់រងរបួសរលាកពេញខ្លួន ចំណែកបុរសជានជាតិខ្មែរម្នាក់ជាម្ចាស់រថយន្តរបួសស្រាល។
តាមការបញ្ជាក់ពីម្ចាស់រថយន្តបានឱ្យដឹងថា រូបគាត់ដឹកជនជាតិចិនទាំង៣នាក់ចេញពីភ្នំពេញបំណងទៅកំពង់សោម ខណៈកំពុងបេីកបរ ជនជាតិចិនទាំងនោះបានទាញបារីមកជក់។ ពេលឃើញបែបនេះ ដោយសារតែរថយន្តរបស់គាត់បំពាក់ហ្គាសទេីបហាមមិនឱ្យជក់បារី តែ ជនជាតិចិនទាំងនោះមិនស្តាប់ទេីបផ្ទុះឆាបឆេះតែម្តង។
ក្រោយកេីតហេតុជនរងគ្រោះត្រូវបានបញ្ជូនទៅមន្ទីរពេទ្យភ្លាមៗ ចំណែករថយន្តត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាលរដ្ឋបាលចោមចៅទី៣រង់ចាំដោះស្រាយពេលក្រោយ៕ដោយ៖សុខាសែនជ័យ
