ខេត្តសៀមរាប : មានករណីបាក់រលំដើមឈើមួយដើមយ៉ាងធំ នៅចំណុចក្លោងទ្វារទន្លេអុំ នៃខេត្តសៀមរាប បានសង្កត់លើរឺម៉កកង់បីខ្មែរ បណ្តាលឱ្យមានមនុស្សរងរបួស​ កាលពីម៉ោង៥និង៤០នាទី ល្ងាច ថ្ងៃទី២៣ ខែកក្កដា ឆ្នាំ២០២៤។

ពាក់ព័ន្ធក្នុងករណី បាក់រលំដើមឈើមួយដើមយ៉ាងធំខាងលើ ដោយសារតែ ភ្លៀង ខ្យល់កន្ត្រាក់ ប៉ុន្តែបច្ចុប្បន្ននេះ ទាំងសមត្ថកិច្ច និងអាជ្ញាធរ ក៏ដូចជាអាជ្ញាធរអប្សរា មិនទាន់បានបញ្ជាក់ប្រាប់ អំពីជនរងគ្រោះ ដោយគ្រោះធម្មជាតិនេះ មានគ្នាចំនួនប៉ុន្មាននាក់ នៅឡើយទេបើគិតត្រឹម ម៉ោង៧យប់ ថ្ងៃទី២៣ ខែកក្កដា ឆ្នាំ២០២៤ ។

សូមបញ្ជាក់ថា  , ក្រសួងធនធានទឹក និងឧតុនិយម នៅថ្ងៃនេះបានបញ្ជាក់យ៉ាងដូច្នេះថា, កម្ពុជា​ ចាប់ពីថ្ងៃទី២៣ ដល់ថ្ងៃទី២៥ ខែកក្កដា ឆ្នាំ២០២៤​អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់ ព្យុះទី៤ឈ្មោះ ព្រះពិរុណ (Prapiroon) និងព្យុះ ឈ្មោះ ហ្សាមី (Gaemi) គ្រប ដណ្តប់លើសមុទ្រចិនខាងត្បូង នៅមានឥទ្ធិពលលើសមុទ្រ Andaman ភាគកណ្តាល និង ខាងកើតឈូងសមុទ្រថៃ ព្រះរាជាណាចក្រកម្ពុជា និងភាគកណ្តាលនៃអាងទន្លេមេគង្គ និងបណ្តាលឱ្យរបបខ្យល់មូសុងនិរតីមានឥទ្ធិពលមកលើព្រះរាជាណាចក្រកម្ពុជា។

ស្ថានភាពបែបនេះនឹងធ្វើឱ្យ៖ ចាប់ពីថ្ងៃទី២៣ ដល់ថ្ងៃទី២៥ ខែកក្កដា ឆ្នាំ២០២៤

តំបន់វាលទំនាប៖

-សីតុណ្ហភាពមធ្យមអប្បបរមា២៣°C និងសីតុណ្ហភាពមធ្យមអតិបរមា៣១°C។ ខ្យល់បក់ មកពីទិសនិរតី និងទិសបស្ចិម មានល្បឿនមធ្យម ៥,៥០ម៉ែត្រ/វិនាទី។ ខេត្តបន្ទាយមានជ័យ បាត់ដំបង សៀមរាប ពោធិ៍សាត់ កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង ស្វាយរៀង កណ្តាល តាកែវ និងភ្នំពេញ​ អាចមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់គ្របដណ្តប់លើ ផ្ទៃដី២៥%។

ចំពោះព័ត៌មានលំអិត យើងនឹងធ្វើការផ្សព្វផ្សាយពេលក្រោយ នៅពេលដែលទទួលបានរបាយការណ៍ពីសមត្ថកិច្ច និងអាជ្ញាធរពាក់ព័ន្ធ ថាតើមានអ្នករបួស ឬឈាមដល់ស្លាប់យ៉ាងណានោះ ៕

ដោយ : សិលា