ខេត្តក្រចេះ៖ គេប្រទះឃើញផ្សោតញីមួយក្បាលបានងាប់ជាថ្មី នៅច្រាំងទន្លេ ចំណុចភូមិបុសលាវ ឃុំថ្មបុសលាវ ស្រុក ចិត្របុរី ខេត្តក្រចេះ កាលពីថ្ងៃទី៣១ ខែ កក្កដា ឆ្នាំ២០១៦ ។

ប្រជាពលរដ្ឋដែលឃើញផ្សោតងាប់នេះបាននិយាយថាសត្វផ្សោតមួយក្បាលនេះមានប្រវែង ប្រមាណជាងមួយម៉ែត្រនិងមានទម្ងន់ក្បែរ១០០គីឡូក្រាមស្ថិតក្នុងវ័យ បន្តពូជនិងមានកូនតូចមួយក្បាលងាប់ អណ្ដែតនៅទីនោះផងដែរ ។ ប្រជាពលរដ្ឋបានសន្និដ្ឋានថាសត្វផ្សោតមួយក្បាលនេះ ប្រហែលងាប់រយៈពេល២ថ្ងៃមកហើយ ។

ករណីនេះគេសង្ស័យបណ្ដាលមកពី ត្រូវខ្សែភ្លើងឆក់ឬមានជំងឺទើបបណ្ដាលឲ្យសត្វផ្សោតញី មួយក្បាលនេះងាប់បែបនេះហើយក្រោយពីពលរដ្ឋប្រទះឃើញគេឃើញ វត្តមានមន្ត្រីអង្គការWWFមកស្រង់ផ្សោតនេះទៅទីស្នាក់ការរបស់ខ្លួនដើម្បីត្រួតពិនិត្យរកមូលហេតុ។

មន្ត្រីអង្គការWWFខេត្តក្រចេះបាន និយាយថាការងាប់ សត្វផ្សោតនោះខាង ជំនាញមិនទាន់ដឹងពីមូលហេតុនៅឡើយទេខណៈកំពុងវេចខ្ចប់យកទៅស្នាក់ការ អង្គការWWF ដើម្បីពិសោធ។ ជំហានដំបូងលោកបានសន្និដ្ឋានថាផ្សោតមួយក្បាលនេះអាច ងាប់ដោយសាររលូតកូនព្រោះនៅ ជិតផ្សោតនោះមានកូនផ្សោតតូចមួយក្បាលងាប់ផង ៕

ដោយ៖ សហការី