ភ្នំពេញ៖ ស្រ្តីមានបានរត់ទៅនគរបាលប៉ុស្តិ៍ចោមចៅបន្ទាប់ពីក្រុមជនសង្ស័យដាក់សណ្តំលើខ្លួនឡើងវង្វេងវង្វាន់ ដោយបានប្រមូលយកប្រាក់កាស់ និងគ្រឿងអលង្ការជាច្រើនទៅឱ្យគេអស់ពីខ្លួន កាលពីវេលាម៉ោង១១ និង៣០ព្រឹកថ្ងៃទី២៩ ខែកក្កដាឆ្នាំ២០១៦ តាមបណ្តោយផ្លូវបេតុង មុខរោងចក្រQMI ភូមិត្រពាំងពោធិ៍  សង្កាត់ចោមចៅ ខណ្ឌពោធិ៍សែនជ័យ  រហូតមកដល់ វេលាម៉ោង៤និង៣០នាទីរសៀលថ្ងៃទី២ ខែកក្កដា ឆ្នាំ២០១៦ ទើបជនរងគ្រោះរត់ទៅប្តឹងសមត្ថកិច្ចជួយអន្តរាគមន៍។

ជនរងគ្រោះមានឈ្មោះសម គឹម ភេទស្រី អាយុ៤៥ឆ្នាំ ជាកម្មការិនីរោងចក្រ ស្នាក់នៅផ្ទះជួលក្បែររោងចក្រ QME ក្នុងភូមិព្រៃសំរោង សង្កាត់ចោមចៅ មានស្រុកកំណើតនៅខេត្តកំពត ។

ស្ត្រីរូបនោះបានរៀបរាប់ប្រាប់សមត្ថកិច្ចថា កាលពីម៉ោងបាយថ្ងៃត្រង់ថ្ងៃទី២៩ កក្កដា កន្លងមក ខណៈដែលគាត់ចេញពីធ្វើការរោងចក្រ ធ្វើដំណើរដោយថ្មើរជើងទៅផ្ទះជួល បន្ទាប់មកក៏មានក្រុមជនសង្ស័យតែបានមកដាក់ថ្នាំសណ្តំយកលុយទៅបាត់អស់ធ្វើឲ្យវង្វេងស្មារតីតែត្រូវបានអ្នកធ្វើការជាមួយគ្នាជូនយកទៅមន្ទីរពេទ្យ ។ ជនរងគ្រោះបានបន្តថា លុយដែលក្រុមជនសង្ស័យយកទៅនោះលុយដុល្លារចំនួន៣០០ដុល្លារ, ប្រាក់ខ្មែរ២០ម៉ឺនរៀល, គ្រឿងអលង្ការខ្សែ.ក ខ្សែដៃ សរុប៥ជីកន្លះ។

ស្ត្រីនោះបន្តថា លុះក្រុមចោរទៅអស់ គាត់ចុះពីលើផ្ទះវិញក៏ធ្លាក់ពីលើកាំជណ្តើរ២-៣កាំ បណ្តាលឱ្យគាត់ភ្ញាក់ដឹងខ្លួនវិញ តែគាត់ដឹងថា មានគេយកទ្រព្យសម្បត្តិគាត់អស់ហើយ ហើយក៏ដើរទៅរោងចក្រវិញ ក៏សន្លប់នៅទីនោះ រហូតដល់ថ្ងៃទី២ សីហា នេះ ទើបមានអាការៈស្រួលខ្លួន មកដាក់ពាក្យបណ្តឹងតែម្តង ។

ក្រោយពីទទួលពាក្យបណ្តឹងរបស់ជនរងគ្រោះសមត្ថកិច្ចបានកំពុងធ្វើការស៊ើបអង្កេតដើម្បីកំណត់មុខសញ្ញា៕

ដោយ៖ សុខាសែនជ័យ