ភ្នំពេញ៖ ជនសង្ស័យមួយក្រុមបានធ្វេីសកម្មភាពគាស់ទ្វារផ្ទះចូលលួចយកម៉ូតូចំនួន៣គ្រឿងតែបានសម្រេច២គ្រឿងខណៈដែលម្ចាស់មិននៅចាក់សោផ្ទះទុកចោល។
ហេតុការណ៍នេះបានបង្កការភ្ញាក់ផ្អេីលកាលពីវេលាម៉ោង៧ព្រឹក ថ្ងៃទី៤ ខែកញ្ញា ឆ្នាំ២០២៤ ស្ថិតនៅភូមិអករំដួល សង្កាត់សំរោងក្រោម ខណ្ឌពោធិ៍សែនជ័យ។
ជនរងគ្រោះឈ្មោះម៉ា នីកា ភេទស្រីអាយុ២៩ឆ្នាំ មុខរបរលក់តាមអនឡាញ ស្នាក់នៅភូមិអករំដួល សង្កាត់សំរោងក្រោម ខណ្ឌពោធិ៍សែនជ័យ។ ម៉ូតូដែលជនសង្ស័យលួចយកទៅចំនួន២គ្រឿង ម៉ាកzoomer-x ទាំងពីរគ្រឿង ទីមួយពាក់ស្លាកលេខកណ្តាល1AA 4799 និងមួយគ្រឿងទៀតមិនចាំស្លាកលេខ។ ដោយឡែកម៉ូតូមួយគ្រឿងទៀតដែលជនសង្ស័យប្លុងចោលនោះម៉ាកស្កូបពី ពណ៌ស ពាក់ស្លាកលេខ ភ្នំពេញ1FE 2401 ។
តាមការរៀបរាប់ពីជនរងគ្រោះបានឱ្យដឹងថា កាលពីល្ងាចថ្ងៃទី៣ ខែកញ្ញា រូបគាត់បានទៅលេងផ្ទះបងនៅឯតាខ្មៅ ហេីយបានសម្រាកនៅទីនោះ លុះដល់វេលាម៉ោង៣ទៀបភ្លឺ មានបងប្អូនអ្នកជិតខាងបានខលទៅប្រាប់ថា មានឮសំឡេងនៅខាងក្នុងផ្ទះ ពេលនោះរូបគាត់បានប្រាប់ថា គាត់អត់នៅផ្ទះទេ បេីមានសំឡេងចេញពីក្នុងផ្ទះមានតែចោរចូល។
ជនរងគ្រោះបានបន្តទៀតថា ពេលនោះរូបគាត់ក៏បានធ្វេីដំណេីរចេញពីក្រុងតាខ្មៅមកដល់ផ្ទះក៏ឃេីញទ្វារចំហ ដោយបាត់ម៉ូតូចំនួន៣គ្រឿង ទេីបឆោឡោឡេីងតែម្តង។
ជនរងគ្រោះបន្តទៀតថា លុះមកដល់វេលាម៉ោង៧ព្រឹកទេីបរូបគាត់ដេីរស្វែងរកឃេីញម៉ូតូមួយគ្រឿងម៉ាកស្កូបពីដែលត្រូវបានជនសង្ស័យប្លុងចោលក្នុងទឹកចំណែក២គ្រឿងទៀតជនសង្ស័យយកទៅបាត់។
ក្រោយកេីតហេតុសមត្ថកិច្ចបានចុះទៅដល់ចំណុចកេីតហេតុសួរនាំនិងឆែកកាមេរ៉ាសុវត្តិភាព ហេីយនាំជនរងគ្រោះទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលសំរោងក្រោម៕ដោយ៖សុខាសែនជ័យ
