ភ្នំពេញ៖ ក្មេងស្រីសិស្សាសាលាម្នាក់បានស្លាប់យ៉ាងអាណោចអាធ័មនឹងក្មេងប្រុសម្នាក់ទៀតរងរបួសយ៉ាងធ្ងន់ធ្ងរ ដោយសាតែរថយន្តយីឌុបដឹកដីមួយគ្រឿងបើកលឿនដូចហោះ ហើយជ្រុលទៅបុកម៉ូតូពីក្រោយយ៉ាងពេញទំហឹង ។
ហេតុការណ៍នេះបានបង្កការណ៍ភ្ញាក់ផ្អើលកាលពីវេលាម៉ោង១១និង៣០នាទីថ្ងៃត្រង់ថ្ងៃទី០៦ ខែសីហា ឆ្នាំ២០១៦ តាមកំណាត់ផ្លូវ២១៧ (ផ្លូវចំការដូង)ស្ថិតនៅក្នុងភូមិថ្មី សង្កាត់ដង្កោ ខណ្ឌដង្កោ ។
ក្មេងស្រីរងគ្រោះដែលត្រូវរថយន្ដដឹកដីបុកឲ្យស្លាប់មានឈ្មោះ ហេន ម៉ារីយ៉ា អាយុ១៣ឆ្នាំ ជាសិស្សរៀននៅអនុវិទ្យាល័យដង្កោ ថ្នាក់ទី ៧ និងកូនប្រុសម្នាក់ទៀតរងរបួសជើងខាងស្ដាំដែលមានឈ្មោះ ហេន សិរិសូនី អាយុ៣ឆ្នាំ អ្នកទាំងពីរនាក់ មានទីលំនៅនៅភូមិម័ល សង្កាត់ដង្កោ ខណ្ឌដង្កោ រីឯអ្នកបើករថយន្តបង្កមានឈ្មោះ អៀម សារ៉ាន់ ភេទប្រុស អាយុ៣២ឆ្នាំ មុខរបរជាអ្នកបើរថយន្ដដឹកដី ដែលស្នាក់នៅ ភូមិទ្រា ៣ សង្កាត់ស្ទឹងមាជ័យ ខណ្ឌមានជ័យ ហើយមានស្រុកកំណើតនៅភូមិ ចន្ថាខ ឃុំស្ពឺខ ស្រុកបាភ្នំ ខេត្តព្រៃវែង ។
ប្រភពពត៌មានពីប្រជាពលរដ្ឋដែលរស់នៅក្បែកន្លែងកើតហេតុបានប្រាប់ឲ្យដឹងថា ដំបូងគេឃើញជនរងគ្រោះទាំង២នាក់បានជិះម៉ូតូឌុបគ្នា ម៉ូតូម៉ាកលេត ពណ៌ទឹកប្រាក់ ពាក់ស្លាកលេខ ភ្នំពេញ 1FJ-0135 ដោយធ្វើដំណើក្នុងទិសដៅពីជើងទៅត្បូង លុះមកដល់ចំណុចកើតហេតុស្រាប់តែត្រូវបានរថយន្ដដឹកដីម៉ាក ដុងហ្វេង (DONGFENG) ពណ៌ស ពាក់ស្លាកលេខភ្នំពេញ 3C-7835 បានបើកមកបុកពីក្រោយយ៉ាងពេញទំហឹង ហើយធ្វើឲ្យក្មេងស្រីរងគ្រោះខ្ទាតចូលក្រោមកង់រថយន្ដកិនស្លាប់នៅនឹងកន្លែងតែម្ដង ចំណែកក្មេងប្រុសរងគ្រោះវិញត្រូវបានអ្នកជិតខាងជួយអូសចេញពីរថយន្ដទាន់ពេលហើយបានបញ្ជូនទៅសង្គ្រោះនៅមន្ទីពេទ្យផងដែរ។ ដោយឡែកឯតៃកុងរថយន្ដត្រូវបានឃាត់ខ្លួនសួរនាំនៅអធិការរដ្ឋាននគរបាលខណ្ឌដង្កោ។
ក្រោពេលកើតហេតុសមត្ថកិច្ចបានចុះធ្វើវាស់វែងហើយយករថយន្ដនឹងម៉ូតូព្រមទាំងតៃកុងរថយន្ដទៅចរាចរណ៍ផ្លូវគោក ក្រុងភ្នំពេញ ដើម្បីដោះស្រាយតាមនីតិវិច្បាប់៕
ដោយ៖ជីម ភារ៉ា ដង្កោ
