ភ្នំពេញ៖ ក្រោយការប្រឹងប្រែងអស់រយៈពេល៣ឆ្នាំប៉ុណ្ណោះ តារាសម្តែង ឆានុន ឆៃយ៉ាង ទទួលបានការគាំទ្រច្រើនពីទស្សនិកជនតាមរយៈការសម្តែង និងបង្ហាញម៉ូតមួយចំនួន។ ថ្មីៗនេះតារាប្រុសវ័យក្មេងរូបនេះកំពុងក្តាប់បានតំណែងជាតួអង្គសំខាន់ក្នុងខ្សែភាពយន្តភាគ និងខ្សែភាពយន្តខ្នាតធំ៥រឿងព្រមៗគ្នា។
ការប្រឹងប្រែងតស៊ូ បូកផ្សំជាមួយនឹងសមត្ថភាពទេពកោសល្យ និងរូបស្រស់សង្ហារបស់តារាសម្តែងវ័យ២៤ឆ្នាំរូបនេះគឺមិនពិបាកនឹងទទួលបានការចាប់អារម្មណ៍ពីមហាជននោះទេ។ ផលិតករមួយចំនួនចាប់ផ្តើមសម្លឹងមើលមកតារាសម្តែងរូបនេះកាន់តែច្រើនក្រោយពីស្នាដៃក្នុងការងារសិល្បៈរបស់ ឆៃយ៉ា ចាប់ផ្តើមហក់ឡើងខ្លាំង។
តារាសម្តែង ឆានុន ឆៃយ៉ា បញ្ជាក់ថា លោកធ្លាប់ចូលរួមប្រកួតក្នុងកម្មវិធី Freshie Girl & Boy 2014 ប៉ុន្តែដោយសារមានបញ្ហាលោកបានដកខ្លួនចេញពីការប្រឡង។ លោកថា ទោះមានបញ្ហាប្រឈមក្នុងជីវិតពិសេស ទោះបីជាកូនកំព្រាឪពុកម្តាយក្តីក៏តារាប្រុសរូបនេះបន្តប្រឹងប្រែងជម្នះបំពេញក្តីបំណងក្លាយជាសិល្បករមួយរូបរហូតលោកទទួលបានការអាណិតស្រលាញ់ និងទុកចិត្តពីសមត្ថភាពសម្តែងពីផលិតករជាច្រើន។ លោកថា ដើមឡើយការប្រឡូកក្នុងអាជីពជាអ្នកសិល្បៈត្រឹមតែជាអ្នករាំអមឆាក និងធ្វើការងារជាកម្មករសំណង់បណ្តើរដើម្បីទប់ទល់នឹងជីវភាពលំបាក។ លោកពិតជាស្មានមិនដល់ក្នុងការទទួលបានការងារសិល្បៈជាច្រើននៅក្នុងដៃ ដែលចាប់ពីដើមឆ្នាំ២០១៦មក លោកត្រូវបានផលិតកម្មជាច្រើនទាក់ទងឲ្យចូលរួមសម្តែង បើទោះបីជាមិនស្ថិតក្នុងតំណែងតួឯក ប៉ុន្តែលោកអាចឈោងចាប់បានតំណែងតួរងសំខាន់ៗនៅក្នុងរឿងបន្តបន្ទាប់។ លោកថាមានខ្សែភាពយន្ត៤រឿងបាននឹងកំពុងថតគឺមានរឿងខ្នាតធំរបស់ផលិតកម្ម LD Picture គឺរឿង”ត្រកូលអ្នកប្រដាល់” ខ្សែភាពយន្តភាគរឿង ”ទីបញ្ចប់នៃស្នេហ៍” របស់ទូរទស្សន៍CTN រឿង ”ម្ទេសហិលអំបិលប្រៃ” របស់ទូរទស្សន៍ PNN និងខ្សែភាពយន្តភាគរឿង “មន្តស្នេហ៍ក្រមុំបាយឆា” របស់ផលិតកម្ម LD Picture ។ ក្រៅពីនេះនៅមានខ្សែភាពយន្តថ្មីមួយទៀតដែលកំពុងពិភាក្សាគ្នា ហើយលោកអាចនឹងទទួលបានតំណែងជាតួឯកផងដែរ។ លោកបន្តថា ក្រៅពីស្ថានីយទូរទស្សន៍ និងផលិតកម្មខាងលើ លោកក៏ត្រូវបានផលិតកម្មក្នុងស្រុកមួយចំនួនបានទាក់ទងជាបន្តបន្ទាប់ផងដែរ។ លោកថាការទទួលយកខ្សែភាពយន្តជាច្រើនបន្តបន្ទាប់ដែលស្ទើរតែគ្មានថ្ងៃសម្រាកនេះព្រោះតែលោកមិនចង់បោះបង់ឱកាសដ៏ល្អនេះចោល ហើយលោកយល់ថា ខ្សែភាពយន្តទាំងនេះនឹងជួយឲ្យលោកលេចមុខកាន់តែខ្លាំងក្នុងអាជីពសិល្បៈ។
តារាសម្តែងរូបនេះបញ្ជាក់ដែរថា ទោះបីជាទទួលបាការងារ និងប្រាក់ចំណូលកើនឡើងជាមុនក្តីក៏លោកនៅតែមិនទាន់បោះបង់ក្តីស្រម័យ និងការខិតខំប្រឹងប្រែងបន្តដើម្បីឈោងចាប់ជាតារាសម្តែងលេចធ្លោរនៅថ្ងៃខាងមុខ៕
ដោយ៖ វឌ្ឍនា
