ខេត្តស្វាយរៀង៖ ស្ត្រីម្នាក់ត្រូវបានសមត្ថកិច្ចនគរបាលក្រុងបាវិត ឃាត់ខ្លួនពាក់ពន្ធ័នឹងករណីហិង្សាដោយចេតនា ខណៈយកកាំបិតទៅចាក់ភាគីរងគ្រោះជាសង្សារស្រីដូចគ្នា(ស្រីស្រឡាញ់ស្រី) ក្នុងហាងផឹកស៊ីមួយកន្លែង កាលពីវេលាម៉ោង៧យប់ ថ្ងៃទី៧ ខែសីហា ឆ្នាំ២០១៦ នៅភូមិ ថ្នល់ទទឹង សង្កាត់ច្រកម្ទេស ក្រុងបាវិត ខេត្តស្វាយរៀង ដោយសារមូលហេតុប្រចណ្ឌ និយាយជាមួយប្រុសផ្សេង ។
សមត្ថកិច្ចនគរបាលបានឲុ្យដឹងថា នារីសង្ស័យបង្កហេតុមានឈ្មោះ សោម បូណារី អាយុ២៣ឆ្នាំ មុខរបរកម្មការិនី រោងចក្រ មានទីលំនៅភូមថ្នល់ទទឹង សង្កាត់ច្រកម្ទេស ក្រុងបាវិត។ រីឯជនរងគ្រោះជាសង្សារមានឈ្មោះ ហាស ទីណា ភេទស្រី អាយុ២៦ឆ្នាំ មុខរបរ កសិករ មានទីលំនៅភូមិរាមជោ ឃុំស្វាយតាយាន ស្រុកកំពង់រោទ៌ ខេត្តស្វាយរៀង ។
តាមចម្លើយសារភាពរបស់ជនស្ស័យបានប្រាប់ថា រូបគេខឹង និងប្រចណ្ឌ សង្សាររបស់ខ្លួននិយាយលេងជាមួយអ្នកផ្សេង នៅកន្លែងហាងផឹកស៊ីខ្លាំងពេក ទើបទ្រាំមិនបាន ក៏ប្រតាយប្រតប់គ្នាទៅវិញទៅមក ខណៈនោះរូបខ្លួន ក៏ទាញយកកូនកាំបិតចាក់ឲ្យរបួសជាទម្ងន់តែម្ដង ។
បច្ចុប្បន្ន ជនរងគ្រោះត្រូវបញ្ជូនទៅព្យាបាលនៅមន្ទីរពេទ្យស្វាយរៀង រីឯជនសង្ស័យសមត្ថកិច្ចនាំមកប៉ុស្តិ៍រដ្ឋបាល ដើម្បីសាកសួរបន្តចាត់ការតាមច្បាប់ ៕
ដោយ៖ យឹម សុថាន
