ភ្នំពេញ៖ ស្នាដៃនិពន្ធប្រលោមលោក របស់អ្នកស្រីប៉ាល់ វណ្ណារីរក្ស រឿង «បំភ្លេចមិនបាន» ដែលជាប្រលោមលោកដ៏ល្បីល្បាញ នឹងត្រូវគេលើកយកទៅផលិតជាខ្សែភាពយន្ត ប្រមាណ៥០ភាគ ដាក់បញ្ចាំងលើកញ្ជាក់ទូរទស្សន៍PNN នៅចុងឆ្នាំនេះ ។ ទាំងអ្នកនិពន្ធ ផលិតករ និងសិល្បករ សុទ្ធតែបានដាក់ក្តីរំពឹងខ្ពស់ថា ខ្សែភាពយន្តនេះ នឹងទទួលបានការគាំទ្រច្រើននៅពេលដាក់បញ្ចាំងជាផ្លូវការ ។

ប្រលោមលោករឿង «បំភ្លេចមិនបាន» ទទួលបានការគាំទ្រខ្លាំង ក្រោយពីមិត្តអ្នកអានក្រោយពីរឿងនេះ ទទួលបានចំណាត់ថ្នាក់លេខមួយ ក្នុងការប្រកួតប្រជែងពានរង្វាន់ព្រះសីហនុរាជ ឆ្នាំ១៩៩៥ ។ រឿងនេះ អាចអន្ទងអ្នកអាន និងអ្នកសិក្សាទាំងខ្មែរ និងបរទេសជាច្រើន ចាប់អារម្មណ៍ជាបន្ទាប់ ។ ទាំងអ្នកនិពន្ធ និងផលិតករ សុទ្ធតែបង្ហាញពីក្តីរំពឹងខ្ពស់ថា រឿងនេះនឹងក្លាយជាទីចាប់អារម្មណ៍ របស់ទស្សនិកជន ក្រោយពេលការសម្រួលឲ្យចេញផលិតជាភាពយន្តភាគ ។ ការបញ្ជាក់នេះ ត្រូវបានធ្វើឡើងកាលពីព្រឹកថ្ងៃទី៨ ខែសីហា ឆ្នាំ២០១៦ ក្នុងពិធីក្រុង ពាលី បើកការផលិតខ្សែភាពយន្តភាគខាងលើ ក្រោមវត្តមានសិល្បករ ផលិតករ ជាច្រើនរូបចូលរួម ។

អ្នកនិពន្ធស្រីល្បីឈ្មោះ អ្នកស្រី ប៉ាល់ វណ្ណារីរក្ស មានប្រសាសន៍ថា ខ្សែភាពយន្តរឿង «បំភ្លេចមិនបាន»នេះ ធ្លាប់បានបោះពុម្ពជាសៀវភៅចំនួន៣លើករួចមកហើយ ។ អ្នកស្រីថា រឿងនេះ គឺបានបង្ហាញពីការបែកបាក់គ្រួសារ ដោយសារសង្គ្រាម និងបញ្ហាខ្សែជីវិតរបស់ក្មេងស្រីកំព្រាម្នាក់ ដែលមានការតស៊ូព្យាយាមអំណត់អត់ធន និងមានប្រាជ្ញាឈ្លាសវៃពុះពារគ្រប់ឧបសគ្គរហូតទទួលបានជោគជ័យក្នុងជីវិត ។

អ្នកស្រីបន្តថា មានអារម្មណ៍សប្បាយចិត្ត នៅពេលដែល វាត្រូវបានសម្រួលដើម្បីផលិតជាខ្សែភាពយន្តភាគ ដែលទោះមានការពិបាកបន្តិចក្នុងការសម្រួលរឿងប្រលោមលោកឲ្យទៅជាខ្សែភាពយន្ត ប៉ុន្តែអ្នកស្រីនៅតែព្យាយាមហើយបានដាក់ក្តីរំពឹងខ្ពស់ថា នឹងទទួលបានការគាំទ្រច្រើន ។

អ្នកស្រីថាកន្លងមករឿង «រនោចផុតហើយ» របស់អ្នកស្រី ក៏ត្រូវបានគេយកមកផលិតជាខ្សែភាពយន្តដែរ ហើយទទួលបានការគាំទ្រជាច្រើនពីទស្សនិកជន ។ អ្នកស្រីបន្តថា រឿងនេះទទួលបានភាពល្បីល្បាញច្រើន រហូតអ្នកសិក្សាជនជាតិថៃបានជ្រើសរើសយកទៅធ្វើជាសារណាបញ្ចប់ការសិក្សាថ្នាក់អនុបណ្ឌិតហើយ ក៏មានអ្នកសិក្សានៅសាកលវិទ្យាល័យជាច្រើននៅក្នុងនិងក្រៅប្រទេសលើកយកទៅសិក្សាស្រាវជ្រាវជាញឹកញាប់ ។

លោក អ៊ិន សុភិន អគ្គនាយកផលិតកម្មមហាហង្ស បានបញ្ជាក់ថា ខ្សែភាពយន្តរឿង «បំភ្លេចមិនបាន» នឹងត្រូវចំណាយការផលិតជាច្រើនខែ មុនពេលចាក់បញ្ចាំងនៅទូរទស្សន៍PNN ក្នុងអំឡុងចុងឆ្នាំ២០១៦នេះ។

លោកថា ខ្សែភាពយន្តនេះ នឹងចំណាយការផលិតប្រមាណ១០ម៉ឺនដុល្លារអាមេរិក គឺជាការចំណាយមួយច្រើនគួរសម ដែលសម្រិតសម្រាំងទាំងសាច់រឿងនិងគុណភាព ។ លោកបន្តថា លោកបានសម្រេចចិត្តជ្រើសរើសប្រលោមលោកនេះមកថតជាខ្សែភាពយន្ត ព្រោះតែវាមានសាច់រឿងល្អ ជារឿងដែលល្បីល្បាញខ្លាំង ទាំងក្នុង និងក្រៅប្រទេស ហើយលោករំពឹងថា ខ្សែភាពយន្តនេះ នឹងទទួលបានការគាំទ្រ និងចាប់អារម្មណ៍ខ្លាំងពីមហាជន ពិសេសអត្ថន័យជ្រាយជ្រៅ និងការអប់រំខ្លាំង ។ ទោះជាយ៉ាងណា លោកថា មានសាច់រឿងមួយចំនួនតូចនឹងត្រូវបានកែសម្រួលដើម្បីឲ្យស្របទៅនឹងបច្ចុប្បន្នភាពរបស់សង្គម ។ លោកថា ផលិតកម្មបន្តរក្សាជំហរដែលមិនត្រឹមតែមានរឿងដែលមានសាច់រឿងល្អ មានតារាសម្តែង មានសមត្ថភាពបច្ចេកទេសការផលិតទំនើប ដែលនាំឲ្យមានការផលិតខ្សែភាពយន្តដែលមានគុណភាពមួយ ។

គួរបញ្ជាក់ថា ខ្សែភាពយន្តនេះ មានការចូលរួមសម្តែងដោយតារាប្រុស ស្រីល្បីឈ្មោះជាច្រើនរូបនឹងមានវត្តមានក្នុងការសម្តែងខ្សែភាពយន្តភាគរឿង «បំភ្លេចមិនបាន»នេះ មានដូចជាកញ្ញានី មុនីនាថ លោកអូន ឧស្សាហ៍ លោកហម ឈរ៉ា អ្នកស្រីចាន់ តារាទី កញ្ញា ម៉ៅ គឹមធីតា អ្នកនាង និន សុធារ៉ា លោក លាង ឧត្តម លោក លឹម តិចម៉ុង លោកហេង ស៊ីមន លោកអៀង ចេនឡា ជាដើម ៕

ដោយ៖ វឌ្ឍនា