ភ្នំពេញ ៖ ហេតុការណ៍ភ្ញាក់ផ្អើលមួយបន្ទាប់ពីប្រទះឃើញលោកតាម្នាក់ ខណៈធ្វើការងារក្នុងវត្តរួចចុះងូតទឹករអិលជើងលង់ស្លាប់ កាលពីវេកាម៉ោង៤និង២០នាទីរសៀលថ្ងៃទី០៧ ខែសីហា ឆ្នាំ២០១៦ ស្ថិតនៅស្រះទឹកក្នុងវត្ត គោកបញ្ជាន់ ភូមិចោមចៅ សង្កាត់ចោមចៅ ខណ្ឌពោធិ៍សែនជ័យ ។

ជនរងគ្រោះឈ្មោះ អ៊ុក ឈឺន ភេទប្រុស អាយុ៧៥ ឆ្នាំ រាល់ថ្ងៃធ្វើការងារបោសជូតសម្អាតក្នុងវត្ត មានទីលំនៅក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ ។

តាមប្រជាពលរដ្ឋបានឲ្យដឹងថា មុនកើតហេតុគេឃើញលោកតាកាន់ចបកាប់មួយទៅជម្រះស្មៅនៅតាមមាត់ស្រះទឹក តែពុំមានអ្នកណាចាប់អារម្មណ៍ ព្រោះគាត់ធ្វើការងារបែបនេះរាល់ថ្ងៃទៅហើយ លុះដល់វេលាម៉ោងខាងលើស្រាប់តែ ប្រទះឃើញជនរងគ្រោះនៅក្នុងទឹក ដៃខ្វៃៗ ផ្អើល នាំគ្នារត់ទៅជួយស្រង់ដាក់លើគោម តែហួសពេលទៅហើយរួបគាត់បានស្លាប់បាត់ទៅហើយ  ទើបរាយការណ៍ប្រាប់សមត្ថកិច្ចចុះពិនិត្យនិងកោសល្យវិច័យ ។

ក្រោយពីសមត្ថកិច្ចពិនិត្យរួចសាច់ញាតិក៏មិនបានប្តឹងផ្តល់អ្វីដែរ ការស្លាប់របស់លោកតាពិតជាលង់ទឹកពិតប្រាកដមែនរួចប្រគល់ជូនក្រុមគ្រួសារយកទៅធ្វើបុណ្យតាមប្រពៃណីនៅផ្ទះជនរងគ្រោះ ៕

ដោយ៖ សុខាសែនជ័យ