ភ្នំពេញ៖ កម្លាំងនគរបាលអន្តរាគមន៍ពិសេសរាជធានីភ្នំពេញសហការជាមួយនគរបាលប៉ុស្ដិ៍ទឹកថ្លា ចុះបង្ក្រាបចាប់ជនសង្ស័យជួញដូរគ្រឿង២នាក់និងថ្នាំញៀន១កញ្ចប់។
ករណីចាប់ឃាត់ខ្លួនជនសង្ស័យខាងលើធ្វើឡើងនៅវេលាម៉ោង២ និង៣០នាទីរសៀលថ្ងៃទី៨ ខែសីហា ឆ្នាំ២០១៦ នៅតាមបណ្តោយផ្លូវ២៧១ ក្នុងសង្កាត់ទឹកថ្លា ខណ្ឌសែនសុខ។
ប្រភពពីសមត្ថកិច្ចបានឲ្យដឹងថា មុនឈានដល់ការឃាត់ខ្លួនជនសង្ស័យខាងលើ កម្លាំងអន្តរាគមន៍ពិសេសរាជធានីភ្នំពេញបានប្រទះឃើញជនសង្ស័យ២នាក់ខាងលើជិះម៉ូតូ១គ្រឿងដោយគ្មានពាក់មួកសុវត្ថិភាព សមត្ថកិច្ចក៏ឃាត់ខ្លួនដើម្បីសួរនាំតែជនសង្ស័យទាំង២នាក់មិនព្រមឈប់រួចព្យាយាមបើករត់។
ប្រភពពីសមត្ថកិច្ចបានបន្តថា បន្ទាប់ពីជនសង្ស័យព្យាយាមបើករត់ហើយបានបោះថ្នាំញៀនចោលនៅតាមផ្លូវ ទើបសមត្ថកិច្ចប្រដេញធ្វើការឃាត់ខ្លួនបានរួមទាំងវត្ថុតាងគ្រឿងញៀនជាក់ស្តែងតែម្តង។
បច្ចុប្បន្នជនសង្ស័យទាំង២កំពុងសាកសួរនៅប៉ុស្តិ៍នគរបាលទឹកថ្លា ដើម្បីកសាងសំណុំរឿងបញ្ជូនទៅចាត់ការតាមនីតិវិធី៕
ដោយ៖ តុង សីហា
