ភ្នំពេញ៖ ក្រុមក្មេងស្ទាវ២ក្រុមបានដេញវាយគ្នានៅតាមដងផ្លូវដូចក្នុងរឿងកុនហុងកុង ដោយមួយក្រុមៗ ប្រដាប់ដោយដាវសាមូរ៉ៃ និងដុំថ្មគ្រប់ដៃ ជិះម៉ូតូជាច្រើនគ្រឿង ។

ករណីនេះកើតឡើងកាលពីវេលាម៉ោង៣ទៀបភ្លឺថ្ងៃទី០៩ ខែសីហា ឆ្នាំ២០១៦ ស្ថិតនៅចំណុចខារ៉ាអូខេ អេលេហេ្គន ខេធីវី តាមបណ្ដោយផ្លូវលេខ១១៣ កែងផ្លូវលេខ៣០០ ក្នុងសង្កាត់បឹងកេងកង២ ខណ្ឌចំការមន រាជធានីភ្នំពេញ ។

ប្រភពពីកន្លែងកើតហេតុឲ្យដឹងថា មុនពេលកើតហេតុគេឃើញក្រុមក្មេងស្ទាវ២ក្រុមទើបតែចេញមកពីខារ៉ាអូខេ អេលេហេ្គន ខេធីវី ហើយក៏បានស្រែកឡូឡាមិនទាន់ដឹងរឿងអីផងស្រាប់តែក្រុមក្មេងស្ទាវទាំង២ក្រុមនោះបាននាំគ្នាដេញវាយគ្នានៅតាមដងផ្លូវដូចក្នុងរឿងកុនហុងកុង ដោយមួយក្រុមៗ ប្រដាប់ដោយដាវសាមូរ៉ៃ និងដុំថ្មគ្រប់ដៃ ជិះម៉ូតូជាច្រើនគ្រឿង ។

ក្រោយកើតហេតុកម្លាំងសមត្ថកិច្ចប៉ុស្តិ៍ក៏ចុះមកដល់កន្លែងកើតហេតុ តែក្រុមក្មេងស្ទាវទាំង២ក្រុមបានរត់គេចខ្លួនបាត់សម្រោល ៕

ដោយ៖ សរស្មី