ភ្នំពេញ៖ ក្រសួងបរិស្ថាន នៅថ្ងៃទី២២ ខែតុលា ឆ្នាំ២០២៤នេះ បានឱ្យដឹងថា ក្នុងឱកាសចូលជួបសម្តែងការគួរសម និងពិភាក្សាការងារជាមួយ លោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន កាលពីរសៀលម្សិលមិញនេះនៅទីស្តីការក្រសួងបរិស្ថាន ប្រតិភូ និងថ្នាក់ដឹកនាំគណបក្សនយោបាយ និងសម្ព័ន្ធភាពសង្គមស៊ីវិល បានរួមគ្នាធ្វើការប្តេជ្ញាចិត្តក្នុងការដោះស្រាយវិវាទបរិស្ថាន បញ្ហា ជាពិសេសការអនុវត្តយុទ្ធសាស្ត្របញ្ចកោណស្តីពីបរិស្ថាន (2023-2028). យុទ្ធសាស្ត្រនេះមានសារៈសំខាន់ណាស់ដើម្បីធានាបាននូវភាពស្អាត ភាពបៃតង និងចីរភាពក្នុងការគ្រប់គ្រងបរិស្ថាន និងធនធានធម្មជាតិកម្ពុជា។
លោកបណ្ឌិត អ៊ាង សុផល្លែត បានស្វាគមន៍ការសម្រេចចិត្តដ៏ត្រឹមត្រូវបែបនេះ ដើម្បីបង្កើតអនាគតស្អាត និងបៃតងសម្រាប់កម្ពុជា និងធ្វើឱ្យលំនៅដ្ឋានរបស់យើងមានការអភិវឌ្ឍរឹងមាំ និងរីកចម្រើនប្រកបដោយចីរភាព។ លោករដ្ឋមន្ត្រីបានសង្កត់ធ្ងន់បន្ថែមទៀតនូវសារៈសំខាន់នៃកិច្ចខិតខំប្រឹងប្រែងសហការជាមួយតំណាងគណបក្សនយោបាយ និងអង្គការសង្គមស៊ីវិល ដើម្បីលើកកម្ពស់ភាពស្អាតស្អំលើដី សមុទ្រ និងអាកាស ដែលជាវិធីសាស្រ្តផ្លាស់ប្តូររបៀបនៃការរស់នៅរបស់ពលរដ្ឋកម្ពុជាប្រកបដោយសេចក្តីថ្លៃថ្នូរ។ ការផ្លាស់ប្តូរអាកប្បកិរិយាបែបនេះ ក៏ក្លាយជាភាពទាក់ទាញដ៏សំខាន់មួយសម្រាប់ភ្ញៀវទេសចរ និងវិនិយោគិនផងដែរ ដើម្បីលើកតម្កើងកេរ្តិ៍ឈ្មោះកម្ពុជាលើឆាកពិភពលោក។
លោកបណ្ឌិត សុផល្លែត សង្កត់ធ្ងន់ថា ការចូលរួមរបស់អ្នកស្រឡាញ់បរិស្ថានពិត គឺមានន័យថា ការគោរពស្រឡាញ់កម្ពុជា ហើយពួកគេមិនចូលរួមសកម្មភាពនយោបាយបង្កគ្រោះថ្នាក់ និងធ្វើឱ្យខូចកិត្តិយសកេរ្តិ៍ឈ្មោះកម្ពុជាឡើយ។ រួមគ្នាដើម្បីកម្ពុជាស្អាត គឺជាវិធីធានាថាផ្ទះរបស់យើងស្អាត។ លើសពីនេះ លោករដ្ឋមន្ត្រី បានលើកទឹកចិត្តដល់តំណាងគណបក្សនយោបាយ និងសម្ព័ន្ធភាពសង្គមស៊ីវិលទាំងអស់ ត្រូវដាំដើមឈើបន្ថែមទៀត ជាពិសេសដើមត្នោត ថែរក្សាវប្បធម៌ខ្មែរ អត្តសញ្ញាណជាតិខ្មែរ លើកស្ទួយគម្របបៃតងនៅកម្ពុជា ព្រមទាំងបង្កើតកេរ្តិ៍ដំណែលដ៏មានតម្លៃសម្រាប់កូនចៅជំនាន់ក្រោយ។
គួរកត់សម្គាល់ថា ទោះបីមេដឹកនាំគណបក្សនយោបាយអាចមានឧត្តមគតិខុសគ្នាក៏ដោយ តែនាំគ្នាធ្វើការងារបរិស្ថាន។ នេះដាក់ឱ្យឃើញថា បរិស្ថានឆ្លងថ្នាក់ ពូជសាសន៍ ពណ៌សម្បុរ ឬនិន្នាការនយោបាយ ដោយសារគ្រោះធម្មជាតិជះឥទ្ធិពលដល់មនុស្ស សត្វ និងធម្មជាតិទាំងអស់ដោយគ្មានការលើកលែងនៅទូទាំងពិភពលោក។ នេះជាលើកទី១ ដែលសាធារណជនកម្ពុជា បានធ្វើសក្ខីភាព តំណាងគណបក្សនយោបាយ មានទស្សនៈផ្សេងៗគ្នា លើកស្ទួយកម្ពុជា ស្អាត បៃតង និងចីរភាព៕
ដោយ៖តារា
