ភ្នំពេញ៖ រថយន្ដម៉ាកអុីស៊ុយស៊ុយ សង្ស័យម្ចាស់ស្រវឹងស្រាជោកជោំបានបើទៅបោះពួយយ៉ាងលឿនទៅបុករបាំងថ្មពុះចែកទ្រូងផ្លូវ បណ្តាលឲ្យរថយន្តទើលើរបាំងទៅមុខលែងរួច និងបាក់របាំងថ្មអស់២កង់ ។

ករណីគ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៩យប់ថ្ងៃទី១២ ខែសីហា ឆ្នាំ២០១៦ នៅចំណុចមុខ សាកលវិទ្យាល័យភូមិន្ទភ្នំពេញផ្លូវ១១០ ក្រុម៦២ ភូមិ១៦ សង្កាត់ទឹកល្អក់ទី១ ខណ្ឌទួលគោក ។

តាមប្រភពពីមន្ត្រីនគរបាលចរាចរណ៍ខណ្ឌទួលគោកបានឲ្យដឹងថា នៅមុនពេលកើតហេតុគេបានឃើញរថយន្តបង្កម៉ាកអុីស៊ុយស៊ុយ ពណ៌ស្លែ ពាក់ស្លាកលេខ ខេមរភូមិន០៩.២:៩០៧៨ មួយគ្រឿង បើកបរដោយបុរសម្នាក់ទំនងជាស្រវឹងជោកជាំបានបើកបររថយន្តតាមបណ្តោយផ្លូវសហព័ន្ធរុស្សីុក្នុងទិសដៅពីកើតមកលិច លុះបើកមកដល់ចំណុចកើតហេតុខាងលើ បានរេចង្កូតទៅបុករបាំងថ្មយ៉ាងពេញទំហឹងបណ្តាលឲ្យបាក់អស់ចំនួន២កង់ ចំណែកឯរថយន្តបង្កបានរងការខូចខាតយ៉ាងដំណំ ប៉ុន្តែសំណាងល្អអ្នកបើកបរមិនរងរបួសធ្ងន់ធ្ងរនោះទេ ។

ក្រោយពេលកើតហេតុរថយន្តបង្កត្រូវបាននគរបាលជំនាញខណ្ឌទួលគោក ធ្វើការវាស់វែងរួចប្រគល់ឲ្យនគរបាលការិយាល័យចរាចរណ៍ជើងគោករាជធានីភ្នំពេញ ដើម្បីដោះស្រាយទៅតាមនីតិវិធី ៕

ដោយ៖ ស ដារ៉ា