ភ្នំពេញ ៖ រថយន្តម៉ាក Toyota Prius មួយគ្រឿងបើកលឿននៅត្រង់ចំណុចផ្លូវបំបែកជ្រុលទៅបុករថយន្តស៊េរីទំនើបម៉ាក ALPHARD មួយគ្រឿងដែលឆ្លងផ្លូវខ្វះការប្រុងប្រយ័ត្នបណ្ដាលឱ្យក្រឡាប់ផ្ងារជេីងទៅប៉ះបង្គោលបង្ហាញលេខផ្លូវចំនួន១ដើមទ្រេតចុះមកក្រោមរងការខូចខាត ។

ហេតុការណ៍គ្រោះថ្នាក់ចរាចរណ៍នេះបានបង្កការភ្ញាក់ផ្អើលកាលពីវេលាម៉ោង ជាង១២រំលងអធ្រាត្រឈានចូលថ្ងៃទី២២ ខែធ្នូ ឆ្នាំ២០២៤ នៅត្រង់ចំណុចផ្លូវបំបែកជាបួន តាមបណ្តោយផ្លូវលេខ ៣១៣ កែងផ្លូវលេខ ៥៦៦ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ ។
តាមប្រភពព័ត៌មានពីប្រជាពលរដ្ឋបានឱ្យដឹងថា មុនពេលកើតហេតុ គេឃើញបុរសជាជនជាតិចិន៣ទៅ៤នាក់បានបើកបររថយន្តមួយគ្រឿងម៉ាក ALPHARD ពណ៌ខ្មៅ ពាក់ផ្លាកលេខ ភ្នំពេញ 2BF-3721 តាមបណ្តោយផ្លូវលេខ ៥៦៦ ក្នុងទិសដៅពីត្បូងទៅជើង ខណៈមកដល់ចំណុចផ្លូវបំបែកជាបួនក៏ស្រាប់តែមានរថយន្តមួយគ្រឿង ម៉ាក TOYOTA PRIUS ពណ៌ទឹកប្រាក់ ពាក់ផ្លាកលេខ ភ្នំពេញ 2AP- 6915 បើកបរក្នុងល្បឿនយ៉ាងលឿនក្នុងទិសដៅពីលិចទៅកើត ជ្រុលទៅបុករថយន្តALPHARD ចំពីចំហៀងផ្នែកខាងក្រោយពេញទំហឹង ក្រឡាប់ផ្ងារជើងវិល២ជុំទៅបុកជាមួយបង្គោលបង្ហាញលេខផ្លូវទ្រេតមកក្រោមថែមទៀត តែក្នុងករណីនេះមិនបង្កឱ្យនរណាម្នាក់រងរបួសនោះឡើយ ។
ក្រោយពេលកើតហេតុ សមត្ថកិច្ចមូលដ្ឋានបានចុះមកដល់ រួចធ្វើការបន្តទាក់ទងទៅមន្រ្តីជំនាញចរាចរណ៍ ផ្លូវគោក នៃស្នងការដ្ឋាននគរបាលរាជធានីភ្នំពេញដើម្បីស្ទូចរថយន្ដទាំង២គ្រឿងទៅរក្សាទុករង់ចាំដោះស្រាយគ្នានៅពេលក្រោយ ៕ ដោយ ៖ ភារ៉ា ដង្កោ