ការិយាល័យរដ្ឋាភិបាលរបស់អុីរ៉ង់ត្រូវតែបិទឬកាត់បន្ថយម៉ោងធ្វើការ។ សាលារៀនបានប្តូរទៅរៀនតាមអុីនធឺណិត។ ផ្លូវហាយវេនិងផ្សារទំនើបស្ថិតក្នុងភាពងងឹត ហើយរោងចក្រឧស្សាហកម្មក៏គ្មានអគ្គិសនីដែរ ដែលនាំឱ្យផលិតកម្មឈានដល់ការផ្អាក។

ទោះបីជាប្រទេសអុីរ៉ង់មានទុនបម្រុងឧស្ម័នធម្មជាតិ និងប្រេងឆៅដ៏ធំបំផុតរបស់ពិភពលោកក៏ដោយ ក៏ប្រទេសនេះស្ថិតក្នុងវិបត្តិថាមពលដ៏ទូលំទូលាយ។ មូលហេតុអាចជាលទ្ធផលនៃទណ្ឌកម្មជាច្រើនឆ្នាំ ការគ្រប់គ្រងមិនត្រឹមត្រូវ ហេដ្ឋារចនាសម្ព័ន្ធវ័យចំណាស់ ការប្រើប្រាស់ខ្ជះខ្ជាយ និងការវាយប្រហារគោលដៅដោយអុីស្រាអែល។
លោកប្រធានាធិបតី Masoud Pezeshkian បានសង្កត់ធ្ងន់នៅក្នុងសុន្ទរកថាផ្ទាល់តាមកញ្ចក់ទូរទស្សន៍ជាតិថា “យើងកំពុងប្រឈមមុខនឹងអតុល្យភាពដ៏ធ្ងន់ធ្ងរនៅក្នុងឧស្ម័ន អគ្គិសនី ថាមពល ទឹក រូបិយប័ណ្ណ និងបរិស្ថាន។
ទោះបីជាអុីរ៉ង់មានបញ្ហាហេដ្ឋារចនាសម្ព័ន្ធជាច្រើនក្នុងប៉ុន្មានឆ្នាំចុងក្រោយនេះក៏ដោយ ក៏ប្រធានាធិបតី Pezeshkian បានព្រមានថាស្ថានភាពបានឈានដល់កម្រិតធ្ងន់ធ្ងរ។
ប្រទេសនេះស្ទើរតែបិទទ្វារអស់ជាច្រើនសប្តាហ៍កន្លងមកនេះ ដើម្បីរក្សាថាមពល។ ទោះបីជាប្រជាជនអុីរ៉ង់មានការខឹងសម្បាហើយមេដឹកនាំឧស្សាហកម្មបានព្រមានថា ការខាតបង់អាចឈានដល់រាប់សិបពាន់លានដុល្លារក៏ដោយ ក៏ប្រធានាធិបតី Pezeshkian មិនអាចផ្តល់ដំណោះស្រាយអ្វីក្រៅពីការសុំទោសនោះទេ។
ប្រធាន Pezeshkian បាននិយាយថា “នៅឆ្នាំក្រោយ យើងនឹងព្យាយាម ដើម្បីកុំឱ្យរឿងនេះកើតឡើង” ។ មន្ត្រីអុីរ៉ង់បាននិយាយថា ប្រទេសនេះត្រូវការឧស្ម័នប្រហែល 350 លានម៉ែត្រគូបក្នុងមួយថ្ងៃ។ នៅពេលដែលសីតុណ្ហភាពធ្លាក់ចុះ និងតម្រូវការកើនឡើង អាជ្ញាធរត្រូវងាកទៅរកវិធានការខ្លាំងចំពោះឧស្ម័ន។
រដ្ឋាភិបាលប្រឈមមុខនឹងជម្រើសដ៏លំបាកពីរ៖ កាត់ផ្តាច់សេវាឧស្ម័នដល់គ្រួសារ ឬបញ្ឈប់ការផ្គត់ផ្គង់ដល់រោងចក្រថាមពល។
ពួកគេបានជ្រើសរើសជម្រើសចុងក្រោយ ពីព្រោះការកាត់ផ្តាច់ឧស្ម័នទៅកាន់តំបន់លំនៅឋានអាចនាំឱ្យមានគ្រោះថ្នាក់ធ្ងន់ធ្ងរ ហើយនឹងកាត់ផ្តាច់ប្រភពកម្តៅចម្បងសម្រាប់ប្រជាជនអុីរ៉ង់ភាគច្រើន។
លោក Seyed Hamid Hosseini សមាជិកនៃគណៈកម្មាធិការថាមពលនៃសភាពាណិជ្ជកម្មបានប្រាប់កាសែត New York Times ថា “គោលនយោបាយរបស់រដ្ឋាភិបាលគឺដើម្បីទប់ស្កាត់រាល់ការចំណាយលើការផ្អាកការផ្គត់ផ្គង់ឧស្ម័ន និងកម្តៅដល់គ្រួសារ” ។
លោក Hosseini បាននិយាយថា “ពួកគេកំពុងព្យាយាមអស់ពីសមត្ថភាពដើម្បីគ្រប់គ្រងវិបត្តិ និងកម្រិតការខូចខាត ពីព្រោះស្ថានភាពបច្ចុប្បន្នគឺដូចជាគ្រាប់បែកកំណត់ម៉ោងដែលអាចផ្ទុះ និងបង្កឱ្យមានអស្ថិរភាពនៅទូទាំងប្រទេស” ។
គិតត្រឹមថ្ងៃទី 20 ខែធ្នូ រោងចក្រថាមពលរហូតដល់ 17 បានបញ្ឈប់ដំណើរការទាំងស្រុង ហើយនៅសល់តែដំណើរការមួយផ្នែកប៉ុណ្ណោះ។
ក្រុមហ៊ុន Tavanir ដែលជាក្រុមហ៊ុនថាមពលរបស់រដ្ឋបានព្រមានរោងចក្រផលិតពីដែករហូតដល់កញ្ចក់ អាហារ ថ្នាំ ថាពួកគេត្រូវត្រៀមលក្ខណៈសម្រាប់លទ្ធភាពនៃការដាច់ចរន្តអគ្គិសនីដែលរីករាលដាលជាច្រើនថ្ងៃ ឬច្រើនសប្តាហ៍។ ដំណឹងនេះបានធ្វើឲ្យឧស្សាហកម្មសាធារណៈ និងឯកជនទាំងមូលធ្លាក់ក្នុងភាពវឹកវរ៕ ដោយធីរីណា

រូបថត​: Reuters