ខេត្តកំពង់ចាម÷សមត្ថកិច្ចនគរបាលនៃអធិការដ្ឋាននគរបាលស្រុកកងមាស នៅថ្ងៃទី ២៧ ខែធ្នូឆ្នាំ ២០២៤ បានឃាត់ខ្លួនជន សង្ស័យម្នាក់ពីបទចោរកម្ម ដែលបាន ធ្វើសកម្មភាព នៅចំណុចព្រែកអង្កត់ខ្មៅ ភូមិកងតាណឹងទី ៥ ឃុំកងតាណឹង ស្រុកកងមាស ។
បើតាមលោក ភោគ សាវុធ អភិបាល នៃគណ: អភិបាលស្រុកកងមាស បានឲ្យដឹងថា យោងពាក្យបណ្តឹង ចុះថ្ងៃទី២៧ ខែធ្នូ ២០២៤ របស់ឈ្មោះ អ៊ុន ចាន់ទី ភេទប្រុស អាយុ៤៣ឆ្នាំ ទីលំនៅភូមិកងតាណឹងទី៤ ឃុំកងតាណឹង ស្រុកកងមាស ខេត្តកំពង់ចាម បានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលកងតាណឹង ថាកាលពីថ្ងៃទី២៦ ខែធ្នូ ឆ្នាំ ២០២៤វេលាម៉ោង១០និង១៥នាទី ខ្លួនបានបាត់ម៉ាស៊ីនបូមទឹក ១គ្រឿង នៅចំណុចព្រែកអង្កត់ខ្មៅ ភូមិកងតាណឹងទី៥ ឃុំកងតាណឹង ស្រុកកងមាស ។
លោកអភិបាលស្រុកបានបន្តថា ក្រោយពីទទួលពាក្យបណ្ដឹងរួច មក កម្លាំងសមត្ថកិច្ចបានចុះស្រាវជ្រាវ ហើយសង្ស័យទៅលើឈ្មោះ វឿន ប៊ុនគីម ភេទប្រុសអាយុ ១៥ ឆ្នាំ នៅភូមិកងតាណឹងទី៥ ឃុំកងតាណឹង ស្រុកកងមាស ដើម្បីមកសាកសួរ ។
ក្រោយមកឈ្មោះ វឿន ប៊ុនគីម បានសារភាពថា ខ្លួនពិតជាបានលួចម៉ាស៊ីនចំនួន ០៣ គ្រឿង ហេីយដឹកយកទៅលក់នៅកន្លែងទិញអេតចាយ នៅភូមិស្វាយស្រណោះ១ ឃុំរការអា ស្រុកកងមាស បន្ទាប់មកកម្លាំងសមត្ថកិច្ចយេីង បាននាំជនសង្ស័យខាងលេីទៅចង្អុលបង្ហាញនិងដកយកម៉ាស៊ីនប៉ូមទឹកមកវិញ ។
លោកអភិបាលស្រុកបានបញ្ជាក់ថា ជនសង្ស័យ តេស្តសារធាតុញៀន ៖អវិជ្ជមាន។ បច្ចុប្បន្នសមត្ថកិច្ចបាន ឃាត់ខ្លួនជនសង្ស័យខាងលើ ដើម្បីកសាងសំណុំរឿងតាមនីតិវិធី ៕
