តាមប្រភពពីគេហទំព័ររបស់អេស្ប៉ាញបានឲ្យដឹងថា ក្លិបល្បីមកពីអង់គ្លេស Manchester City បានព្រមព្រៀងគ្នាជាមួយក្លិប Barcelona ទិញអ្នកចាំទី Claudio Bravo ក្នុងតម្លៃ២១,៧លានផោន (ជិត២៨លាន ដុល្លារ) ។

អ្នកចាត់ការក្រុម Man City លោក Pep Guardiola ចង់បានអ្នកចាំទីវ័យ៣៣ឆ្នាំ Bravo សម្រាប់ជម្រើសដៃទី១នៅកីឡដ្ឋាន Etihad ខណៈដែល Joe Hart ពុំស្ថិតក្នុង គម្រោងរបស់លោកនោះទេ ហើយរូបគេ អាចនឹងចាកចេញពីក្រុម ។ អ្នកចាំទីដៃទី១ជម្រើសជាតិអង់គ្លេស ( Joe Hart) បានត្រឹមអង្គុយកៅអីបម្រុងប៉ុណ្ណោះកាលពីប្រកួត Premier League បើកឆាកសប្ដាហ៍ដំបូង។

ក្លិប Barcelona បានសម្រេចឲ្យ Bravo ចាកចេញ ហើយនឹងឲ្យអ្នកចាំទីវ័យ២៤ឆ្នាំ Marc Andre ter Stegen ជាជម្រើសដៃទី១ មកជំនួសវិញសម្រាប់រដូវកាលថ្មីក្រោមការដឹកនាំរបស់លោក Luis Enrique។ Claudio Bravo រំពឹងថា នឹងធ្វើដំណើរទៅទីក្រុង Manchester កាលពីថ្ងៃសប្តាហ៍មុនដើម្បី បញ្ចប់ការផ្ទេរឲ្យបានរួចរាល់មុនចុងសប្ដាហ៍នេះ៕

ដោយ៖ ដេវីត