ភ្នំពេញ៖ បុរសម្នាក់បើកម៉ូតូលឿនជ្រុលទៅបុកជាមួយឡំប្រឺតាបណ្ដាលឱ្យដួលអូសជាច្រើនម៉ែត្រប៉ះនឹងម៉ូតូមួយគ្រឿងទៀតសន្លប់រងរបួសធ្ងន់ ។
ហេតុការណ៍នេះបង្កឱ្យមានការភ្ញាក់ផ្អើលឡើងកាលពីម៉ោង៩យប់ ថ្ងៃទី២៩ ខែមករា ឆ្នាំ២០២៥ស្ថិតនៅតាមបណ្ដោយផ្លូវជាតិលេខ៤ ទល់មុខសាលាសង្កាត់ចោមចៅ៣ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
ប្រភពព័ត៌មានពីពលរដ្ឋនៅកន្លែងកើតហេតុបានឱ្យដឹងថា នៅមុនពេលកេីតហេតុគេឃេីញជនរងគ្រោះជិះម៉ូតូម្នាក់ឯងម៉ាកហុងដា ADV ពណ៌ខ្មៅ ពាក់ស្លាកលេខភ្នំពេញ1KP-8798 ធ្វើដំណើរក្នុងទិសដៅពីលិចទៅកេីតបោះពួយយ៉ាងលឿន រួចក៏ទៅបុកជាមួយឡំប្រឺតាមិនចាំស្លាកលេខបណ្ដាលឱ្យដួលអូសជាច្រើនម៉ែត្ររងរបួសធ្ងន់ធ្ងរសន្លប់ស្ដូកស្ដឹង ចំណែកម៉ូតូខ្ទាតទៅប៉ះនឹងម៉ូតូមួយគ្រឿងទៀតម៉ាកហុងដាឌ្រីមស៊េរីឆ្នាំ២០២១ពណ៌ខ្មៅពាក់ស្លាកលេខភ្នំពេញ1IT-7151 រងការខូចខាតក្រពឹតស្លាកលេខតែម្ចាស់មិនមានរងរបួសនោះទេ រីឯម្ចាស់ឡំប្រឺតាបានបេីកចាកចេញពីកន្លែងកើតហេតុ ហើយសមត្ថកិច្ចបានចុះមកដល់ទាក់ទងហៅរថយន្តសាមុយមកដឹកជនរងគ្រោះយកទៅសង្គ្រោះបន្ទាន់នៅមន្ទីរពេទ្យលោកសង្ឃភ្លាមៗ ។
បន្ទាប់ពីកេីតហេតុម៉ូតូទាំងពីរគ្រឿងត្រូវបានសមត្ថកិច្ចនគរបាលមូលដ្ឋានវាស់វែងយកទៅរក្សាទុកនៅប៉ុស្តិ៍បណ្ដោះអាសន្នរង់ចាំដោះស្រាយគ្នានៅពេលក្រោយ៕
ដោយ៖ ជ្រោយពេជ្រ
