ខេត្តតាកែវ៖ នៅព្រឹកថ្ងៃទី ១៨ ខែសីហា ឆ្នាំ ២០១៦ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម បានអញ្ជើញចុះពិនិត្យការងារអន្តរាគមន៍បូមទឹកសង្គ្រោះស្រូវនៅស្ថានីយសម្តេច ហ៊ុន សែន ទី២២-ទី២៣ (ទន្លេបាទី) និងស្ថានភាពទឹកនៅក្នុងប្រឡាយមេហនុមាន ស្ថិតក្នុងស្រុកបាទី ខេត្តតាកែវ ។
មន្ត្រីបានអោយដឹងថាៈ ទឹកដែលក្រុមការងារក្រសួង បាន និងកំពុងនាំពីប្រភពទឹក ត្រង់ចំណុចស្ពានដើមឫស (ផ្លូវជាតិលេខ៣) ស្ថិតក្នុងស្រុកកណ្តាលស្ទឹង ខេត្តកណ្តាល ទៅកាន់ប្រឡាយមេហនុមាន បានចូលដល់ទន្លេបាទីហើយ ។ ប៉ុន្តែ ទឹកមិនទាន់ឡើងដល់ក្បាលបូមម៉ាស៊ីនបូមទឹកស្ថានីយសម្តេច ហ៊ុន សែន ទី២២-ទី២៣ នៅឡើយ ដូចនេះ ក្រសួងនៅតែបន្តប្រើប្រាស់ជាបបណ្តោះអាសន្ននូវម៉ាស៊ីនចល័តខ្នាតមធ្យម ចំនួន ០៤ គ្រឿង ដើម្បីបូមពីទន្លេបាទី ទម្លាក់ចូលប្រឡាយមេហនុមាន ។ តាមរយៈការអន្តរាគមន៍ នាពេលនេះ ប្រឡាយមេហនុមាន មានទឹកគ្រប់គ្រាន់សម្រាប់បងប្អូនបូមបញ្ចូលស្រែ ។
បើតាមលោក ស្រី សំបូរ មេឃុំកណ្តឹង ស្រុកបាទី បានជម្រាបជូនលោករដ្ឋមន្ត្រីថា មកដល់ពេលនេះ បងប្អូនដែលធ្វើស្រែសន្ទូង បានបូមបញ្ជូលស្រែស្ទើរគ្រប់ស្រែអស់ហើយ តែបងប្អូនដែលធ្វើពង្រោះ មិនទាន់សូវមានអ្នកបូមទេ អាចរង់ចាំ ៣-៤ ថ្ងៃទៀត នៅតែគ្មានភ្លៀង ទើបចាប់ផ្តើមបូម ។
លោករដ្ឋមន្ត្រី បានណែនាំដល់មន្ត្រីបច្ចេកទេស ដែលកំពុងប្រចាំការនៅទីនោះ ត្រូវបន្តយកចិត្តទុកដាក់ពិនិត្យ ថែទាំម៉ាសុីន និងប្រឡាយនាំទឹក ធ្វើយ៉ាងណាកុំឱ្យមានការរាំងស្ទះដល់ការអន្តរាគមន៍នេះ ៕
ដោយ សុខ ខេមរា
