ភ្នំពេញ ៖ ក្រុមចោរឆក់២នាក់បានធ្វើសកម្មភាពឆក់យកកាបូបស្ពាយពីស្រី្តជនជាតិចិនម្នាក់ដែលជិម៉ូតឌុប តែមិនបានសម្រេច ធ្វើឲ្យអ្នកបើកម៉ូតូដួលរងរបួសបែកមុខបែកបែកមាត់សន្លប់ស្តូកនៅកន្លែងកើតហេតុ ហើយក្រុមចោរទាំងនេះបានជិះម៉ូតូគេចបាត់ទៅ។

ហេតុការណ៍នេះកើតឡើងកាលពីវេលាម៉ោង៨និង៥០នាទីយប់ថ្ងៃទី១៨ ខែសីហា ឆ្នាំ២០១៦ នៅត្រង់ចំណុចផ្លូវ១៧៣ កែង៤២៤ សង្កាត់ទំនប់ទឹក ខណ្ឌចំការមន ។

ជនរងគ្រោះជាអ្នករត់ម៉ូតូឌុបឈ្មោះ ម៉េង ហួរ អាយុ៧២ឆ្នាំ ជាអ្នករត់ម៉ូឌុប ស្នាក់នៅផ្ទះលេខ២១១EO ផ្លូវ២៥៧ ភូមិ៦ សង្កាត់ទឹកល្អក់២ ខណ្ឌទួលគោក ។ រីឯស្រី្តជនជាតិចិនជាម្ចាស់កាបូបមិនត្រូវបានគេស្គាល់ឈ្មោះឡើយ ព្រោះក្រោយចោរឆក់កាបូបមិនបានសម្រេចបានឡើងជិះម៉ូតូឌុបផ្សេងបន្តដំណើរទៅមុខទៀត ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុបុរសរងគ្រោះបានបើកម៉ូតូម៉ាកគុបជ្រុងសេ៧០ ពណ៌ទឹកសមុទ្រ ឌុបស្ត្រីចិនម្នាក់ធ្វើដំណើរតាមផ្លូវ១៧៣ ក្នុងទិសដៅពីជើងទៅត្បូង ។ ខណៈមកដល់ចំណុចកើតហេតុស្រាប់តែមានជនសង្ស័យ២នាក់ជិះម៉ូតូ ប្រភេទអូតូមួយគ្រឿងមិនចាំម៉ាក និងស្លាកលេខ ធ្វើដំណើរមកពីក្រោយធ្វើសកម្មភាពឆក់យកកាបូបស្ពាយពីនារីជនជាតិចិនដែលកំពុងជិះលើម៉ូតូ(អង្គុយខាងក្រោយ) តែមិនបានសម្រេចទើបបណ្ដាលឲ្យដួលម៉ូតូនិងធ្វើឲ្យអ្នកបើកម៉ូតូរងបួសបែកមុខបែកមាត់សន្លប់ស្ដូកស្ដឹង និងស្រី្តជនជាតិចិនជិះពីក្រោយរងបួសស្រាល បានហៅរ៉ឺម៉កម៉ូតូជិះបន្តដំណើរទៅទៀត ។

រីឯជនរងគ្រោះត្រូវបានអ្នកជិតខាង និងអ្នកធ្វើដំណើរជួយសង្គ្រោះ គក់ច្របាច់យ៉ាងយូរ ទើបដឹងខ្លួនវិញរួចបញ្ជូនទៅកាន់គ្លីនិកឯកជនក្បែរនោះ។ ដោយឡែកជនសង្ស័យឃើញសភាពបែបនេះ បានបន្ថែមល្បឿនរត់គេចខ្លួនបាត់ស្រមោល ។

ប្រភពព័ត៌មានដដែលបានឲ្យដឹងទៀតថា ក្រោយពេលកើតហេតុ សមត្ថកិច្ចមូលដ្ឋានបានទៅដល់កន្លែងកើតហេតុ បានត្រឹមធ្វើកំណត់ហេតប៉ុណ្ណោះ៕

ដោយ៖ ស រស្មី