ភ្នំពេញ៖ កម្លាំងនគរបាលខណ្ឌពោធិ៍សែនជ័យ ដោយមានការបញ្ជាផ្ទាល់ពីលោក យឹម សារ៉ាន់ អធិការបន្តបង្រ្គាបមុខសញ្ញាជួញដូរ និងប្រើប្រាស់គ្រឿងញៀនបានជាបន្តបន្ទាប់ដើម្បីសេចក្ដីសុខនិងសុវត្ថិភាពជូនពលរដ្ឋ។
ជាក់ស្ដែងនៅវេលាម៉ោង៤និង៣០នាទីរសៀលថ្ងៃទី១៨ ខែសីហា ឆ្នាំ២០១៦ កម្លាំងនគរបាលប៉ុស្ដិ៍ត្រពាំងក្រសាំង បានធ្វើការចាប់ខ្លួនក្រុមជនសង្ស័យដែលជាមុខសញ្ញាជួញដូរនិងប្រើប្រាស់គ្រឿងញៀនបានចំនួន៤នាក់រួមជាមួយវត្ថុតាងមួយចំនួនធំ នៅចំណុចផ្ទះជួលមួយកន្លែង ដែលមានទីតាំងស្ថិត នៅក្នុងភូមិព្រៃដូនអុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។
ជនសង្ស័យទាំង៤នាក់ដែលត្រូវចាប់ខ្លួនទី១-ឈ្មោះ ប៉ែន សុខចេង ភេទប្រុស អាយុ២៣ឆ្នាំ មានទីលំនៅក្នុងភូមិសំរោង សង្កាត់សំរោងក្រោម ខណ្ឌពោធិ៍សែនជ័យ។ ទី២-ឈ្មោះ ឌី សុផានិត ភេទប្រុស អាយុ២៤ឆ្នាំ មានទីលំនៅក្នុងភូមិសាមគ្គី សង្កាត់ត្រពាំងក្រសាំង ខណ្ឌពោធិ៍សែនជ័យ។ ទី៣-ឈ្មោះ ជៀប ឌុច ភេទប្រុស អាយុ២៨ឆ្នាំ មានស្រុកកំណើតនៅក្នុងភូមិអណ្ដូង ឃុំអណ្ដូង ស្រុកបារភ្នំ ខេត្តព្រៃវែង និងទី៤-ឈ្មោះ ឈុន សុផល ភេទស្រី អាយុ២២ឆ្នាំ មានស្រុកកំណើតភូមិកំពង់ប្រាសាទ ឃុំសែប ស្រុកបរិបូរណ៍ ខេត្តកំពង់ឆ្នាំង ត្រូវជាប្រពន្ធរបស់ឈ្មោះ ជៀប ឌុច ស្នាក់នៅក្នុងភូមិកើតហេតុជាមួយគ្នា។
ដោយឡែកសម្ភារៈដែលចាប់យករួមមានគ្រឿងញៀន២កញ្ចប់ តូច១កញ្ចប់ធំ១កញ្ចប់ ដាវសាម៉ូរៃចំនួន៣ដើម ញញួរ១ ទួនណឺវីសចំនួន២ កន្ត្រៃចំនួន៣ ដែកកេះចំនួន៧ កាំភ្លើងជ័រ១ដើម ទូរស័ព្ទខូចចំនួន៥គ្រឿង រួមជាមួយសម្ភារៈជាច្រើនទៀត។
បច្ចុប្បន្នជនសង្ស័យទាំង៤នាក់រួមទាំងវត្ថុតាងត្រូវបានកម្លាំងនគរបាលប៉ុស្តិ៍ត្រពាំងក្រសាំងកសាងសំណុំរឿងបញ្ជូនបន្តទៅផ្នែកជំនាញខណ្ឌពោធិ៍សែនជ័យចាត់ការបន្តតាមនីតិវិធី៕
ដោយ៖ សុខាសែនជ័យ
...
