ភ្នំពេញ៖ បុរសម្នាក់បានបេីករថយន្តម៉ាក ហាយឡេនឌ័រសង្ស័យក្នុងស្ថានភាពស្រវឹងបានជ្រុលទៅបុកក្បាលនាគថ្មពុះចែកទ្រូងផ្លូវបណ្ដាលឱ្យរងការខូចខាតរថយន្តយ៉ាងដំណំ។
ហេតុការណ៍នេះបានកើតឡើងនៅវេលាម៉ោង ៩និង៣០នាទីយប់ថ្ងៃទី៥ ខែមីនា ឆ្នាំ២០២៥ ជិតស្តុបចេនឡា ផ្លូវលេខ២១៧ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានអោយដឹងថា មុនពេលកេីតហេតុ គេឃើញបុរសម្នាក់បានបេីករថយន្តម៉ាកហាយឡេនឌ័រ ពណ៌ទឹកប្រាក់ ពាក់ស្លាកលេខ ភ្នំពេញ 2BZ-3659 តាមបណ្ដោយផ្លូវលេខ២១៧ក្នុងទិសដៅពីលិចទៅកេីតក្នុងល្បឿនលឿន ដោយសង្ស័យអ្នកបើកស្រវឹងស្រាផង លុះមកដល់ចំនុចកេីតហេតុ ក៏ជ្រុលទៅបុកក្បាលនាគថ្មពុះចែកទ្រូងផ្លូវយ៉ាងពេញទំហឹងបណ្ដាលឱ្យរងការខូចខាតបាក់ខ្ទាតវៀចទ្រង់ទ្រាយដើមអស់មួយ២កង់ ព្រមទាំងធ្វើឱ្យរថយន្តរងការខូចខាតស្រុញខ្ទេចផ្នែកខាងមុខយ៉ាងដំណំ តែសំណាងល្អក្នុងហេតុការណ៍នេះមិនមានគ្រោះថ្នាក់ដល់មនុស្សទេ គ្រាន់តែអ្នកបេីកបរស្ថិតក្នុងស្ថានស្រវឹងត្រូវសមត្ថកិច្ចឃាត់ខ្លួនប្រគល់អោយផ្នែកជំនាញចរាចរណ៍ ។
ក្រោយពេលកេីតហេតុ រថយន្តរួមទាំងអ្នកបេីកបរត្រូវសមត្ថកិច្ចជំនាញស្ទូចយកទៅរក្សាទុកនៅការិយាល័យនគរបាលចរាចរណ៍ផ្លូវគោក រង់ចាំដំណោះស្រាយ ៕
ដោយ៖សុខាសែនជ័យ
