ខេត្តព្រះសីហនុ៖ កម្លាំងអធិការនគរបាលក្រុងព្រះសីហនុ រួមជាមួយប៉ុស្តិ៍រដ្ឋបាលសង្កាត់លេខ៣ សហការជាមួយកម្លាំង ការិយាល័យប្រឆាំងគ្រឿងញៀនខេត្តព្រះសីហនុ បើកការស៊ើបអង្កេតឈានដល់ការឃាត់ខ្លួនមុខសញ្ញាលក់ចែកចាយថ្នាំញៀនម្នាក់។

ករណីចុះបង្ក្រាបនេះធ្វើឡើងនៅវេលាម៉ោងប្រមាណ១០ និង៥០នាទីយប់ថ្ងៃទី២២ ខែសីហា ឆ្នាំ២០១៦ ស្ថិតនៅមុខកំពង់ផែស្វយ័ត ក្រុង-ខេត្តព្រះសីហនុ ខណៈដែលមុខសញ្ញាកំពុងលក់ថ្នាំញៀនជាក់ស្តែងតែម្តង ការចាប់ឆែកឆេររកឃើញថ្នាំញៀនចំនួន២២កញ្ចប់តូចៗ។

មុខសញ្ញាចែកចាយថ្នាំញៀននេះមានឈ្មោះជឿន ផល្លា អាយុ៣៩ឆ្នាំ មុខរបររត់ម៉ូតូឌុប មានទីលំនៅក្រុមទី១ ភូមិ៣ សង្កាត់៣ ក្រុងព្រះសីហនុ តំបន់ខាងកើតរ៉ារទេះភ្លើង។

នៅចំពោះមុខសមត្ថកិច្ចជនសង្ស័យបានសារភាពថា ថ្នាំញៀនទាំងនោះរូបគេបានទិញមកពីភ្នំពេញ ដើម្បីយកមកចែកចាយឲ្យពួកតៃកុងឡានដឹកកុងតឺន័រ ហើយរូបគេបានប្រកបរបរនេះ អស់រយៈពេល៥ទៅ៦ខែមកហើយ៕

ដោយ៖ ឆ្លាម សមុទ្រ