ភ្នំពេញ៖ បុរសម្នាក់រួមនឹងថ្នាំញៀនជាច្រើនគ្រាប់និងកញ្ចប់ ត្រូវបានកម្លាំងនគរបាលផ្នែកយុត្តិធម៌នៃអធិការដ្ឋាននគរបាលខណ្ឌដូនពេញ  សហការជាមួយកម្លាំងនគរបាលការិយាល័យព្រហ្មទណ្ឌកំរិតស្រាលនិងកងអន្តរាគមន៍ពិសេស នៃស្នងការដ្ឋាននគរបាលរាជធានីភ្នំពេញ បានឃាត់ខ្លួនខណៈដែលជនសង្ស័យប្រុងធ្វើសកម្មភាពជួញដូរគ្រឿងញៀនជាក់ស្តែង ។

ករណីឃាត់ខ្លួនបុរសម្នាក់ពីបទរក្សាទុកនូវសារធាតុញៀនដោយខុសច្បាប់ខាងលើនេះ បានធ្វើឡើងកាលពីវេលាម៉ោង១០ និង៣០នាទីយប់ ថ្ងៃទី២២ ខែសីហា ឆ្នាំ២០១៦ ត្រង់ចំណុចមុខខាងជើងបរិវេណវត្តភ្នំ ភូមិ១០ ផ្លូវ៤៧កែង៩០ សង្កាត់វត្តភ្នំ ខណ្ឌដូនពេញ ។

ជនសង្ស័យឈ្មោះផាន វិរះ ហៅវិរះ ភេទប្រុស អាយុ៣២ឆ្នាំ មុខរបរមិនពិតប្រាកដ ស្នាក់នៅផ្ទះលេខ១៣ ផ្លូវ១៥៦ ភូមិ៦ ក្រុម៤០ សង្កាត់វាលវង់ ខណ្ឌ៧មករា រាជធានីភ្នំពេញ ។ វត្តុតាងចាប់យកបាន៖ ម្សៅពណ៌ស សង្ស័យជាគ្រឿងញៀនចំនួន ៦កញ្ចប់តូច (ប្រាំមួយកញ្ចប់តូច), ថ្នាំគ្រាប់ចំនួន៣៤គ្រាប់ ក្នុងនោះមានថ្នាំគ្រាប់ពណ៌បៃតងរាងបេះដូងចំនួន១៤គ្រាប់, ពណ៌ត្រាវរាងជ្រុងចំនួន១០គ្រាប់ និងពណ៌ប្រផេះរាងជ្រុងចំនួន១០គ្រាប់, ទូរស័ព្ទដៃម៉ាកNOKIA ១គ្រឿង , កាបូបដៃ១ និងម៉ូតូម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៦ គ្មានផ្លាកលេខ១គ្រឿង។

បច្ចុប្បន្នជនសង្ស័យកំពុងឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌដូនពេញ ដើម្បីធ្វើការសាកសួរកសាងសំណុំរឿងចាត់ការតាមនីតីវិធីនៃច្បាប់៕

ដោយ៖ ស ដារ៉ា