ភ្នំពេញ​៖​ ស្នងការដ្ឋាន​នគរបាល​រាជធានី​ភ្នំពេញ​ នៅរសៀល​ថ្ងៃទី១៥ ខែមេសា ឆ្នាំ២០២៥នេះ​ បានឱ្យដឹងថា​ មានករណីអគ្គិភ័យឆេះនៅចំណុច សប្បិកម្មផលិតស្បែកជ្រូក កាលពីព្រឹកមិញនេះ​ស្ថិតនៅ ដីឡូតិ៍លេខ២៥ ផ្លូវមាត់ប្រឡាយ ក្រុមទី១៥ ភូមិ៥ សង្កាត់បឹងសាឡាង ខណ្ឌទួលគោក។

ហេតុការណ៍​អគ្គិភ័យឆាបឆេះនេះ បណ្តាលមកពីឆ្លងចរន្តអគ្គិសនីបង្កជាអគ្គិភ័យ។ អគ្គិភ័យនេះធ្វើឱ្យឆេះខូចខាតឃ្លាំងដែកប្រក់ស័ង្កសី ចំនួន ០១ឃ្លាំង រួមទាំងសម្ភារអស់ទាំងស្រុង ហើយបណ្តាលឲ្យឆេះរាលដាលដល់ផ្ទះល្វែង៤ជាន់ ចំនួន ០១លែ្វង ខូចខាតអស់៤០%, ផ្ទះល្វែង ជាន់ផ្ទាល់ដីស្តុកកង្ហារចំនួន ០១ល្វែង ខូចខាតអស់៥០% និងឆេះផ្ទះល្វែងជាន់ផ្ទាល់ដីចំនួន ០១លែ្វង ខូចខាតអស់១០%។

នៅវេលាម៉ោង១៤:០០នាទីរសៀល ខែឆ្នាំដដែល អគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យរាជធានីភ្នំពេញ ចំនួន ២១គ្រឿង ប្រេីប្រាស់ទឹកអស់ចំនួន ១២៦ឡាន ស្មើរនឹង ៥០៦ម៉ែត្រគូប និងរថយន្តជំនួយរួមមាន៖
-រថយន្តអគ្គិភ័យក្រសួងមហាផ្ទៃចំនួន ០២គ្រឿង ប្រើប្រាស់ទឹកអស់ចំនួន ០៦ឡាន ស្មើនឹង ៣៦ម៉ែ្រតគូប ។
-រថយន្តអគ្គិភ័យទីក្រុងចំនួន ០២គ្រឿង ប្រើប្រាស់ទឹកអស់ចំនួន ០២ឡាន ស្មើនឹង ១២ម៉ែ្រតគូប ។
-រថយន្តអគ្គិភ័យកងពលតូចលេខ៧០ចំនួន ០៥គ្រឿង ប្រើប្រាស់ទឹកអស់ចំនួន ០២ឡាន ស្មើនឹង ២០ម៉ែត្រគូប ។
-រថយន្តអគ្គិភ័យបុរីប៉េងហួតចំនួន ០១គ្រឿង ប្រើប្រាស់អស់ចំនួន ០២ឡាន ស្មើនឹង ១២ម៉ែត្រគូប ។
-រថយន្តអគ្គិភ័យក្រុមហ៊ុនស្រាបៀរកម្ពុជាចំនួន ០១គ្រឿង ប្រើប្រាស់អស់ចំនួន ០២ឡាន ស្មើនឹង ១២ម៉ែត្រគូប ៕ដោយ​៖តារា​