ភ្នំពេញ ៖ មួយរយៈពេលកន្លងមកនេះគេឃើញកម្លាំងនគរបាលប៉ុស្តិ៍បឹងកក់ទី២ ខណ្ឌទួលគោក ខំប្រឹងយកចិត្តទុកដាក់យ៉ាងខ្លាំងចំពោះករណីគ្រឿងញៀននៅប្លុករោងចក្រឆ្នាំង ដែលជាកន្លែងសម្រាប់ជួញដូរគ្រឿងញៀនយ៉ាសកម្មនោះ ឥលូវសមត្ថកិច្ចបានចុះបង្រ្កាបជាបន្តបន្ទាប់ ចាប់យកគ្រឿងញៀននិងឃាត់ខ្លួនមនុស្សជាច្រើននាក់បញ្ចូនទៅតុលាការដើម្បីចាត់ការតាមច្បាប់ផងដែរ ។

ជាក់ស្តែងនៅវេលាម៉ោង៩និង២៥នាទីយប់ថ្ងៃទី២៤ ខែសីហា ឆ្នាំ២០១៦ កម្លាំងនគរបាលផ្នែកយុត្តិធម៌ នៃអធិការដ្ឋាននគរបាលខណ្ឌទួលគោក បានសហការជាមួយកម្លាំងការិយាល័យនគរបាលព្រហ្មទណ្ឌកម្រិតធ្ងន់និង កម្លាំងកងអនុសេនាតូច អន្តរាគមន៍ពិសេស នៃស្នងការដ្ឋាននគរបាលរាជធានីភ្នំពេញ បានឃាត់ខ្លួនជនសង្ស័យម្នាក់ជាក់ស្ដែង និងចាប់យកក្រាមពណ៌សថ្លាចំនួន ៥១កញ្ចប់តូច ( សង្ស័យជាគ្រឿងញៀនប្រភេទម៉ាទឹកកក ) នៅចំណុចប្លុករោងចក្រឆ្នាំង ផ្លូវ៦០៨ ក្រុម១០៦ ភូមិ២៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ។

ជនសង្ស័យឈ្មោះ ថា គន្ធា ហៅធា ភេទប្រុស អាយុ២៧ឆ្នាំ ជនជាតិខ្មែរ មុខរបរជាងជួសជុលរថយន្ត ស្នាក់នៅបណ្ដោះអាសន្នក្នុងយានដ្ឋានជួសជុលរថយន្តយីហោ ទឹមពៅ ផ្លូវ២៨៩ សង្កាត់បឹងកក់ទី១ ខណ្ឌទួលគោក រាជធានីភ្នំពេញ មានស្រុកកំណើតភូមិគៀនជ្រៃ ឃុំហាន់ជ័យ ស្រុកកំពង់សៀម ខេត្តកំពង់ចាម ។

ក្នុងការឃាត់ខ្លួនខាងលើនេះដែរសមត្ថកិច្ចបានចាប់យកវត្ថុុតាងមួយចំនួនរួមមាន ក្រាមពណ៌សថ្លាចំនួន៥១កញ្ចប់តូច (សង្ស័យជាគ្រឿងញៀនម៉ាទឹកកក ) ម៉ូតូមួយគ្រឿងម៉ាក Future ពណ៌ខ្មៅ ដែលមានលេខតួ និងលេខម៉សីុន 023788  ទូរស័ព្ទមួយគ្រឿងម៉ាក I call ពណ៌ស ។

បច្ចុប្បន្នជនសង្ស័យកំពុងឃាត់ខ្លួនជាបណ្ដោះអាសន្ននៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី ៕

ដោយ៖ ស ដារ៉ា