អេមីរ៉ាត់អារ៉ាប់រួម (UAE) បានកត់ត្រាសីតុណ្ហភាពខ្ពស់បំផុតគឺ 51.6 អង្សាសេនៅក្នុងខែឧសភា ដែលជិតដល់កម្រិតខ្ពស់បំផុតក្នុងកំណត់ត្រា។

មជ្ឈមណ្ឌលឧតុនិយមជាតិ UAE បានប្រកាសកាលពីថ្ងៃទី 24 ខែឧសភាថា “សីតុណ្ហភាពខ្ពស់បំផុតទូទាំងប្រទេសថ្ងៃនេះគឺ 51.6 អង្សាសេនៅក្នុងទីក្រុង Sweihan ចម្ងាយ 97 គីឡូម៉ែត្រភាគខាងលិចនៃរដ្ឋធានី Abu Dhabi នៅម៉ោង 1:45 រសៀល” ។
នេះជាកំណត់ត្រាសីតុណ្ហភាពក្នុងខែឧសភាក្នុងប្រទេសអារ៉ាប់រួម គឺត្រឹមតែ ០,៤ អង្សាសេ ទាបជាងកម្រិតខ្ពស់ជាប្រវត្តិសាស្ត្រ ៥២ អង្សារសេ ដែលបានកត់ត្រានៅលើកោះ Al Yasat ក្នុងរដ្ឋធានី Abu Dhabi ក្នុងខែមិថុនា ឆ្នាំ ២០១០។
អេមីរ៉ាតអារ៉ាប់រួម ដែលភាគច្រើនជាវាលខ្សាច់ មានទីតាំងនៅក្នុងតំបន់ក្តៅបំផុតមួយក្នុងពិភពលោក ហើយជាពិសេសងាយរងគ្រោះទៅនឹងការប្រែប្រួលអាកាសធាតុ។
សីតុណ្ហភាពក្នុងទីក្រុងឌូបៃនៅថ្ងៃទី២៤ ឧសភា ស្ថិតនៅកម្រិត៤៤-៤៦អង្សាសេ ។ អ្នកបើកបរបានត្អូញត្អែរថា ម៉ាស៊ីនត្រជាក់ក្នុងរថយន្តរបស់ពួកគេមិនគ្រប់គ្រាន់ដើម្បីទប់ទល់នឹងកម្ដៅដែលកំពុងឆាបឆេះ។ មនុស្សជាច្រើនមានការភ្ញាក់ផ្អើលចំពោះការមកដល់ដំបូងនៃរលកកម្ដៅឆ្នាំនេះ។
នៅខាងក្រៅ អ្នកស្រុកឌូបៃនៅតែចេញក្រៅ ហើយខ្លះកាន់ឆ័ត្រ។ ហាងលក់ទឹកផ្លែឈើក្នុងស្រុក និងតូបលក់ដូរមានតម្រូវការខ្ពស់។
ចំនួនថ្ងៃក្តៅខ្លាំងនៅទូទាំងពិភពលោកបានកើនឡើងជិតពីរដងក្នុងរយៈពេល 30 ឆ្នាំចុងក្រោយនេះ។ អ្នកជំនាញនិយាយថា រលកកំដៅកើតឡើងដដែលៗ គឺជាសញ្ញានៃការឡើងកំដៅផែនដី ដោយព្រមានថា បាតុភូតនេះនឹងកាន់តែញឹកញាប់ យូរ និងកាន់តែធ្ងន់ធ្ងរ។
ការសិក្សារបស់ Greenpeace ឆ្នាំ 2022 បានរកឃើញថា មជ្ឈិមបូព៌ាមានហានិភ័យខ្ពស់នៃកង្វះទឹក និងអាហារ និងរលកកំដៅខ្លាំងជាញឹកញាប់ដោយសារតែការប្រែប្រួលអាកាសធាតុ។ ការសិក្សាដែលផ្តោតលើប្រទេសចំនួនប្រាំមួយ រួមទាំង UAE បានរកឃើញថា តំបន់កំពុងឡើងកំដៅផែនដីលឿនជាងមធ្យមភាគពិភពលោកពីរដង៕

រូបថត​: vnexpress