ខេត្តបាត់ដំបង៖ លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង បានឱ្យដឹងថា មន្រ្តីជំនាញសាខា ក.ប.ប. ខេត្តបាត់ដំបងសហការជាមួយសមត្ថកិច្ចចម្រុះខេត្តបាត់ដំបង បានចុះត្រួតពិនិត្យទំនិញ ឧបភោគ បរិភោគ និងទំនិញវេចខ្ចប់ស្រាប់ តាមផ្ទះ ម៉ាត និងតូបលក់ទំនិញក្នុងផ្សារ ចំនួន០២លើក រកឃើញរកឃើញទំនិញខូចគុណភាព និងហួសកាលបរិច្ឆេទប្រើប្រាស់ជាង៩៧គីឡូក្រាម។
លោកស្នងការខេត្ត បានបន្តថា ក្នុងប្រតិបត្តិការនោះ បានធ្វេីឡេីងកាលពីថ្ងៃទី០៤ ខែមិថុនាម្សិលមិញនេះ ដោយគោលដៅទី១ នៅក្នុងផ្សារសំពៅលូន ស្ថិតនៅភូមិត្រពាំងព្រលិត ស្រុកសំពៅលូន ចំនួន០៦តូប រកឃើញទំនិញខូចគុណភាព និងហួសកាលបរិច្ឆេទប្រើប្រាស់ដូចជា៖ មី ភេសជ្ជៈកំប៉ុង នំ និងគ្រឿងសម្អាង មួយចំនួន និងលើកទី២ នៅផ្សារ ហេង ថេង ពេជ្រចិន្តា ស្ថិតនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ចំនួន០៨តូប ០៦ខ្នងផ្ទះ និងម៉ាតចំនួន០២កន្លែង រកមិនឃើញមានទំនិញខូចគុណភាព និងហួសកាលកំណត់ប្រើប្រាស់នោះទេ។
លោកស្នងការខេត្ត បានឱ្យដឹងទៀតថា ចុះត្រួតពិនិត្យហាងម៉ាត ចំនួន០២កន្លែង និងផ្ទះលក់ទំនិញ ចំនួន០២ផ្ទះ ស្ថិតនៅក្នុងស្រុកកំរៀង បានរកឃើញទំនិញខូចគុណភាព និងហួសកាលបរិច្ឆេទប្រើប្រាស់ នៅហាងម៉ាតតេលាមួយកន្លែងដូចជា៖ ទឹកសេរ៉ូដប ទឹកដោះគោប្រអប់ មី នំកញ្ចប់ចំរុះ មួយចំនួន។
គួរបញ្ជាក់ថា ក្នុងប្រតិបត្តិការនោះ កម្លាំងជំនាញបានដកហូតទំនិញសរុបចំនួនជាង៩៧គីឡូក្រាម និងធ្វើកំណត់ហេតុដកហូតយកមករក្សាទុកនៅ សាខា (ក.ប.ប) ខេត្តបាត់ដំបង ព្រមទាំងពិន័យអន្តរការតាមច្បាប់៕
ដោយ៖តារា
